Carlos Gómez Prado, candidato socialista á reelección á alcaldía nas municipais do 28 de maio, presentou hoxe “os meus 25 compromisos cos veciños e veciñas de Baiona”. “Queremos afondar na transformación da vila posta en marcha neste mandato: as políticas sociais, o modelo urbanístico da vila e as parroquias, o turismo e o sector servizos serán os piares da nosa acción de goberno”, explica o candidato socialista.
Entre as prioridades, destaca “rematar a reestruturación do departamento municipal de Urbanismo; a reordenación da zona entre A Concheira e A Ribeira, e o desenvolvemento de proxectos xa confeccionados, como os da Avda. Monterreal, Santa Liberata, casco histórico, ou Praza Victoria Cadaval, entre outros”.
“Axuda no Fogar continuará a medrar, tras triplicarse no actual mandato, e haberá un reforzo moi importante dos programas de conciliación e os dirixidos ás persoas maiores”, sostén Gómez Prado. “Outras medidas importantes serán un Plan Estratéxico do Comercio Local e a remodelación da Praza de Abastos; manter a aposta polo turismo sostible, e o desenvolvemento do proxecto da Asociación de Cidades Colombinas”, engade.
En palabras de Gómez Prado, “a mocidade será protagonista, como pode verse na nosa candidatura, en cultura crearemos locais de ensaio e un itinerario de artistas locais, e reforzaremos a nosa aposta polo deporte inclusivo”.
