O PP de Baiona logrou no pleno do pasado mes de febreiro que o goberno local comprometésese a poñerse en contacto coa Dirección de Patrimonio Cultural da Xunta de Galicia para que este departamento poida realizar as valoracións e traballos oportunos sobre o terreo e determinar se os restos rupestres achados no recinto amurallado do Monterreal son petróglifos. En caso de lograr un resultado positivo, que poidan ser rexistrados e catalogados oficialmente. Con todo, tres meses despois, o tripartito non tramitou o acordo plenario á administración autonómica.
O PP presentou unha moción que se aprobou por unanimidade, contando co voto a favor do tripartito (PSdeG, BNG e NOS), na que se solicitaba, ademais, que de ser considerados estes vestixios como petróglifos desde o Concello pídase ao Ministerio de Turismo, como propietario do inmoble, que valore a posibilidade de potencialos e divulgalos para dotar ao municipio dun maior valor patrimonial e engadilos á lista de atractivos turísticos. Bo exemplo é a arte rupestre do Outeiro dos Lameiros que desde que foi descuberto e catalogado hai 42 anos converteuse en toda unha xoia de obrigada visita para veciños e amantes da arte.
Concelleiros do grupo municipal popular baionés que encabeza Ángel Rodal tiveron a posibilidade de comprobar con anterioridade a existencia do que entenden son un amplo abanico de “cazoletas” que, neste momento e segundo unha pequena investigación levada a cabo polo portavoz antes de presentar a proposta ao pleno, a día de hoxe non contan con catalogación. “Entendemos que é necesario que se realicen os traballos de prospección e documentación para poder poñer en valor este novo patrimonio rupestre en pleno centro da vila e situado nun marco inigualable”, expuxeron os populares na súa proposta, que tras ser aprobada fai tres meses ata o momento o goberno local de Baiona non deu tramitación algunha.
