
Desde este sábado, 29 de abril, e ata o 14 de maio, durante quince días, Sabarís transfórmase nunha gran galería de arte. Máis de 500 obras de 50 artistas encherán de cor e mestría as rúas desta singular zona baionesa. Dos 50 artistas participantes na XV edición do Mercado de Arte de Sabarís, dez expoñerán unha mostra da súa obra nos escaparates dos negocios. Un plano mostrará a roteiro da arte en Sabarís que se poderá visitar a calquera hora do día. Do 12 ao 14 de maio completarase esta gran exposición no Multiusos Mercado de Sabarís, onde estarán o resto dos artistas mostrando as súas obras.
Así mesmo, tras o éxito da posta en marcha por primeira vez do I Certame de Pintura Rápida ao aire libre en Sabarís “Chicho Solveira”, a Asociación de Comerciantes e Empresarios de Sabarís (COEMSA) e a Asociación de Empresarios e Comerciantes do Val Miñor (OVALMI) volven convocalo, co que lembran a figura deste veciño de Sabarís gran amante da pintura. O certame, que se celebrará o vindeiro domingo 14 de maio nas rúas deste lugar, tamén ten como obxectivo fomentar e espertar a creatividade artística a través da pintura.
A temática versará sobre Sabarís en toda a súa extensión, deixando liberdade aos autores en canto á técnica e estilo. A execución será directa, diante do motivo ou do modelo natural. Non se permitirá o uso de fotografías, computadores, cámaras, medios ou materiais gráficos. O concurso está aberto a todos os artistas que o desexen. A inscrición para participar na iniciativa debe facerse a través de correo electrónico escribindo á dirección coemsa2010@hotmail.com.
O prazo permanecerá aberto ata o día 12 de maio, inclusive. Cada artista só poderá presentar unha obra e non poderá asinala ata o momento no que se coñeza o ditame do xurado. Establecéronse dous premios de 800€ e 400€ para o primeiro e o segundo clasificados, respectivamente. Ademais, hai un Premio Especial categoría de 11 a 16 anos, para o mellor artista xuvenil, e outro premio á categoría infantil de 4 a 10 anos, consistentes nun diploma e en materiais de pintura, libros, didáctico.
Cada participante levará o material que considere necesario para desenvolver o seu traballo, incluído o caballete onde se expoñerá a súa obra. O soporte presentarase o día do certame, 14 de maio de 9:00 a 10:30 horas da mañá no Mercado de Arte de Sabarís (Multiusos Mercado de Sabarís, Praza Victoria Cadaval, s/n), para ser selado. As medidas deste non poderán superar os 120 cm no seu lado maior e non poderán ser inferiores a 50 cm no máis pequeno. As medidas da categoría infantil son libres.
O tempo para presentar as obras será ata as 18:00 horas e realizarase nas oficinas do Mercado de Arte de Sabarís. O ditame do xurado coñecerase o mesmo día ás 20:00 horas. As obras non premiadas estarán ao dispor dos autores a partir do ditame dos especialistas. O xurado que avalía as obras estará composto por profesionais das artes plásticas. As obras premiadas pasarán a ser propiedade de COEMSA, así como os dereitos de reprodución.
Esta actividade encádrase dentro da programación do XV Mercado de Arte que se celebrará os próximos 12, 13, 14 de maio no Multiusos Mercado de Sabarís en horario de 11:00 a 21:00 horas.