A xefa do servizo de Hematoloxía e Hemoterapia de Ribera Povisa, Violeta Turcu, recolleu este xoves en Madrid o galardón que acredita ao hospital pola súa eficiente xestión das transfusións de sangue en procesos cirúrxicos.
Un dos resultados desta iniciativa, posta en 2018 no hospital vigués, é que as cirurxías programadas superaron con éxito os momentos de maiores restricións polas reservas da Axencia de Doazón de Órganos e Sangue (ADOS). “Un dos piares da nosa xestión é conseguir que o paciente chegue nas mellores condicións posibles ao quirófano. Para iso, tómanse medidas no preoperatorio, durante a cirurxía e tamén no posquirófano”, explicou a especialista. En concreto, engade, “estes tres piares baséanse na optimización da masa eritrocitaria preoperatoria, a minimización das perdas sanguíneas e a mellora da tolerancia fisiolóxica á anemia”.
“Un bo manexo do sangue salva vidas”, subliñou a doutora Turcu, lembrando un dos lemas elixidos con motivo do Día Mundial do Doante de Sangue, “Save Blood, saves lives”.
Os premios MAPBM, organizados polo proxecto Maturity Assessment Model in Pacient Blood Management e Vifor Pharma, premiaron o esforzo realizado por Ribera Povisa para mellorar os índices de calidade no manexo médico e cirúrxico das transfusións de sangue e, ao mesmo tempo, obter os mellores resultados en saúde e incrementar a seguridade dos pacientes, minimizando o risco no posoperatorio e reducindo a mortalidade.
Medio centenar de hospitais de toda España concorren a estes premios, que recoñecen o labor realizado durante 2022 e o esforzo para poñer en valor a indubidable contribución do seu traballo na mellora da calidade asistencial e a seguridade clínica.
O 50% das transfusións son evitables
A transfusión sanguínea é un procedemento habitual, pero que non está exento de complicacións como as infeccións, que retardan a evolución do paciente. Por iso, o Patient Blood Management (PBM) é a mellor estratexia para previr ou evitar a sobre transfusión nos hospitais e é unha recomendación da Organización Mundial da Saúde desde 2010 e da Unión Europea desde 2017. A posta en marcha dun programa de PBM é transversal a toda a organización e supón unha transformación de cultura organizativa.
En concreto, desde a OMS puxéronse en marcha estratexias a nivel internacional para optimizar este recurso e promóvese o desenvolvemento de programas multidisciplinares PBM para mellorar a evolución clínica do paciente sen recorrer a máis transfusións que as estritamente necesarias xa que, actualmente, calcúlase que máis do 50 por cento das transfusións nas intervencións cirúrxicas son evitables.
