Esquerda Unida solicita ao goberno de Nigrán que estenda o plan antifraude aprobado polo Alcalde de Nigrán, o 7 de marzo, a toda a actividade municipal. Dito plan antifraude, ten como finalidade evitar os conflitos de intereses en relación cos fondos procedentes do Mecanismo para a Recuperación e a Resiliencia. En concreto, este plan estrutúrase en torno aos catro elementos clave do denominado ciclo antifraude: prevención, detección, corrección e persecución e será de aplicación a todos os órganos e a todo o persoal que interveña na xestión de fondos procedentes do Mecanismo para a Recuperación e a Resiliencia.
“Desde Esquerda Unida non entendemos que as medidas antifraude unicamente se apliquen á xestión dos fondos que proveñan da Unión Europea, e non se aplique aos fondos que proveñen dos tributos da veciñanza”, sinala José Cuevas, voceiro de Esquerda Unida en Nigrán, “polo que solicitamos a extensión de dito Plan a toda a actividade municipal. Non hai que esquecer que o goberno municipal de Nigrán, presidido polo actual Alcalde, ten cometido irregularidades en materia de contratación, tal como sinalou a fiscalía no seu día”, finaliza Cuevas.
