O Concello de Nigrán arrancou esta semana os cursos de envellecemento activo coa cifra récord de 170 prazas, todas elas cubertas, e coa principal novidade de sumarse ao Centro da Terceira Idade de A Ramallosa o Local Social de Vilameán rehabilitado polo Concello o ano pasado. Así, aos habituais obradoiros de “Vivilo Corpo” (30 prazas), Informática (40), e Memoria (60) engadiuse un máis para axilizar a memoria en Vilameán (núcleo urbano de Nigrán) con 40 prazas. Todos están dirixidos a persoas maiores de 65 anos empadroadas na localidade e se desenvolverán ata finais de ano con descanso estival.
“Cremos que é un acerto e unha mellora incorporar o local de Vilameán porque facilitamos o acceso a pé a moita xente da contorna que non se podía desprazar tan comodamente a Ramallosa”, explica o alcalde, Juan González. “Axilizar a Memoria era o que rexistraba sempre máis demanda, por iso comezamos con ese en Vilameán”, engade a edil de Maiores, María Mayán.
Facer exercicio, manter a mente activa e non illarse socialmente son os tres eixos que os especialistas recomendan levar adiante para previr deterioracións cognitivas e neles se basea este programa de obradoiros de envellecemento activo que ofrece o Concello de Nigrán.
O carácter fundamental do programa é preventivo, a súa finalidade é a de garantir unha maior calidade de vida dos nosos maiores tratando de evitar ou atrasar a aparición de problemas de memoria, do deterioro cognitivo, do Alzheimer e doutros problemas de saúde e de incapacidades; pero tamén de mellorar aqueles que se poidan ter na actualidade e de acadar un maior grado de autonomía e independencia. “Apostamos por políticas que garantan a calidade de vida dos maiores, tamén con turismo social, bailes e mesmo o centro especializado en demencias neurodexenerativas en Panxón”, indica o alcalde de Nigrán, Juan González.
