Durante o ano 2022, as 54 oficinas de Correos da provincia de Pontevedra recibiron un total de 1.850.722 visitas. No conxunto do Estado, as 2.389 oficinas de Correos recibiron preto de 88 millóns de visitas (en concreto, 87.751.769 visitas). O 63% das visitas recibidas corresponderon a clientes que acudiron ás oficinas para realizar envíos ou adquirir outros produtos ou servizos. O 37% foron de clientes que se dirixiron ás oficinas para recoller os seus envíos.
O volume de visitas mantívose en 2022 en niveis similares aos do ano anterior. Ao longo do ano a oferta prestada en oficinas complementouse con novos servizos como os que ofrecen os carteiros rurais a domicilio ou o envío e recollida de paquetes a través das taquillas intelixentes Citypaq, que reducen os tempos de espera e permiten dar servizo fóra dos horarios de atención de oficinas.
En canto á valoración do servizo, o Índice de Recomendación do Cliente mellorou con respecto a 2021, pasando de 65 a 71 puntos, mentres que o Índice de Satisfacción superou os 86 puntos. Durante 2022, Correos seguiu aumentando os servizos que se ofrecen na súa rede de oficinas, para facilitar o día a día da cidadanía, aproveitando a súa gran capilaridade e total cobertura territorial.
Correos facilita aos cidadáns e empresas diversas xestións e trámites coas Administracións Públicas, como a Oficina de Rexistro Virtual de Entidades (ORVE) ou o pago de recibos, sancións e tributos de distintos organismos públicos. Tamén se comercializan os servizos de telefonía móbil de Correos Telecom, pódense comprar divisas, entradas para actividades de lecer, lotería, billetes de tren AVE, longa e media distancia e acceder á oferta de servizos de compañías de enerxía e seguros. Outro servizo que experimentou unha alta demanda en 2022 foi a adquisición dos distintivos ambientais da DXT.
Ademais, grazas a Correos Cash, as oficinas ofrecen servizos de retirada e ingreso de efectivo aos clientes das entidades financeiras adheridas ao acordo, que tamén pode enviarse a calquera domicilio de España a través dos carteiros e carteiras.
