A Mancomunidade do Val Miñor dá por resolta a crise da temperatura da auga da piscina da Ramallosa tras acadar esta mañá un acordo con Serviocio aceptado nunha Xunta de Portavoces ex-profeso. Así, a concesionaria elevará desde hoxe venres 23 a temperatura a 28,5º tras aceptar finalmente unha modificación do contrato que obrigará a manter eses grados centígrados fronte ao parámetro vixente de entre 24º e 30º. A cambio, e como compensación económica para cumprir co aspecto do mantemento do equilibrio económico, a Mancomunidade lle condonará o canon. A devandita modificación contractual será sometida a tramitación e aprobada en acordo plenario nas vindeiras semanas pero o acordo supón a condonación do canon (12% da facturación) desde o mesmo momento en que se suba a temperatura (acción realizada hoxe, 23 de decembro) e ata o 25 de Maio de 2023 que expira o contrato, estimándose a contía nuns 20.000 € (a razón de 4.000 €/mes).
“Agradezo publicamente a todos os grupos políticos que participaron nesta negociación o apoio e lealdade coa Presidencia da Mancomunidade porque unidos fomos quen de arranxar un problema que era moi complexo e que estivo suxeito a moita demagoxia e manipulación”, explica Juan González, o alcalde de Nigrán e presidente actual da Mancomunidade, quen esta mañá volveu a convocar a Xunta de Portavoces para darlle o visto bo á resolución tras decidir os mesmos o día 15 de Decembro dar os pasos cara a modificación contractual hoxe acatada pola empresa.
“Non era un problema fácil de liquidar porque a temperatura de 25º cumpría co contrato vixente, neste sentido foi imprescindible tamén a axuda de Into Consulting para axudarnos a atopar unha saída ao problema que tivese toda a garantía xurídica”, engade González en referencia á empresa de Nigrán que, ademais, se está a ocupar de realizar a auditoría técnica, económica e laboral e unha memoria xustificativa e prego de prescricións para a futura licitación, xa que a concesión non será prorrogada a Serviocio cando expire (Maio de 2023).
