Baiona coroará esta fin de semana ao mellor J80 do outono en Galicia

Baiona coroará esta fin de semana ao mellor J80 do outono en Galicia na última xornada da Liga de Outono Gestilar J80, a competición de monotipos que o Monte Real Club de Yates vén celebrando en augas da baía desde o pasado mes de outubro.

Máis dunha vintena de J80s de diferentes puntos de Galicia e Portugal veranse as caras na quinta e definitiva etapa, na que está previsto póñanse en xogo tres novas probas. A partir das tres da tarde e cunha previsión meteorolóxica que anuncia boas condicións para regatear (ventos de compoñente sur de entre 8 e 12 nós), as tripulacións volverán medirse nas seis cinguidas e seis popas que supoñerán os percorridos barlovento sotaventos preparados polo comité de regata.

O Alboroto de Juan Carlos Ameneiro, desde a súa posición de líder e cunha marxe de 6 puntos sobre o segundo clasificado, é o que máis papeletas ten para facerse coa vitoria final. O Solventis Ribadeo, no que se alternaron á cana Malalo Bermúdez, Alberto García e Bruno Gago; o Bica, patroneado por Chisco Catalán e o Cansino, encabezado por Fernando Yáñez son, por esa orde, os equipos que ostentan, xunto co Alboroto, as mellores puntuacións, agrupados nunha pinza de 8 puntos. Sucede ademais que o Bica e o Cansino están empatados a puntos na terceira e cuarta posición.

Unha vez finalice a disputa na auga, as tripulacións reuniranse en terra para a celebración, ás oito da tarde, da entrega de premios, na que participarán o presidente do Monte Real Club de Yates, José Luis Álvarez; o delegado de Gestilar en Galicia, Alfonso López; o alcalde de Baiona, Carlos Gómez; e o deputado de deportes da Deputación de Pontevedra, Gorka Gómez.

O punto e final á competición poñerallo unha cea de confraternización no Monte Real Club de Yates, na que participarán todos os armadores e regatistas participantes na liga de Outono Gestilar J80.