Podemos Baiona vén de rexistrar un requirimento ao Concello para solicitar que se fagan públicos os datos do primeiro informe sobre o estado da auga e dos fondos da Foz do Miñor e se conclúa o estudo canto antes dada a importancia da súa recuperación ambiental, ao atoparse esta dentro da Rede Natura así como para recuperar a actividade extractiva.
Dende a formación lembran que aínda que non se deron prazos concretos, valorábase que os primeiros datos concluíntes poderían chegar a partir deste verán. Transcorridos máis de 6 meses dende o anuncio do devandito encargo á empresa Teswater Global, estes aínda non se coñecen nin se publicou ningún tipo de informe. Por iso, dende Podemos Baiona instan ao Concello a facilitar á veciñanza os datos e a documentación achegada ata o momento, tal e como se comprometeran os tres alcaldes do Val Miñor en maio, con motivo do Día Europeo da Rede Natura 2000.
Tras a xuntanza mantida entre a formación e a directiva da Confraría de Baiona, quen tamén manifestaron a súa preocupación polo proxecto de instalación do Parque Eólico Mariño “Volanterio” e o que isto pode provocar na pesca e o marisqueo para as persoas que viven do mar en Baiona, “fomos informados -explica Agustín Silva, voceiro da formación e candidato á alcaldía-, de que a directiva, lamentablemente, segue sen obter información sobre o estado da Foz, aínda que son as persoas principalmente interesadas da súa recuperación”.
“Preocúpanos que dende o Concello sigan ocultando información tan importante á veciñanza de Baiona e do Val Miñor, sendo isto algo habitual, xa que tamén seguimos agardando a documentación da analítica da auga da Fonte do Pombal solicitada por rexistro hai máis dun mes, así como o plan da seca que “supostamente” teñen preparado e enviado á Xunta”.
“É necesario que se dean a coñecer estes datos e, sobre todo, que se coñeza que actuacións teñen previstas levar a cabo dende o Concello xunto con Augas de Galicia e a Xunta”, conclúe Silva.
