Gondomar pon en marcha un ano máis o seu Concurso de Decoración de Nadal

O Concello de Gondomar abre o prazo de inscrición para unha nova edición do Concurso de Decoración de Nadal. Establécense dúas categorías, a primeira está destinada ao pequeno comercio local, no que se poderá decorar o interior de calquera local comercial, o exterior ou os escaparates, con iluminación ou elementos de ornamentación. A segunda categoría, aberta a toda a veciñanza de Gondomar, premiará a mellor decoración en vivendas particulares, con dúas subcategorías; decoración de ventás ou balcóns e vivendas unifamiliares e xardíns.

Para poder optar aos premios a decoración tanto nos comercios como nas vivendas deberá permanecer instalada a lo menos dende o 2 de decembro ata o 7 de xaneiro. O Concello repartirá un total de 1.000 euros en premios, para gastar no comercio local de Gondomar, cun primeiro premio de 200 euros e un segundo premio de 100 euros en cada unha das categorías convocadas.

Ademais entre todos os participantes da categoría de vivendas levarase a cabo un sorteo de dúas tarxetas prepagamento por valor de 50 euros cada unha para consumir no comercio local de Gondomar. O xurado terá en conta diferentes aspectos na súa valoración como a temática, a orixinalidade, a utilización de materiais reciclados, a iluminación ou a extensión ocupada para determinar aos gañadores.

Todos aqueles establecementos comerciais ou particulares interesados en participar teñen á súa disposición toda a información e as bases do concurso na web municipal: http://www.concellodegondomar.gal. O prazo de presentación de solicitudes remata o 11 de decembro. Máis información no correo comercio@concellodegondomar.gal ou nos teléfonos 986.38.40.20/658.540.991.