A través dun acordo de colaboración tres traballadores e un monitor pertencentes ao programa de inserción laboral do Centro Juan María, realizarán traballos de limpeza en parques e xardíns de Gondomar. Esta mañá o alcalde, Paco Ferreira, visitou aos tres traballadores que, a través dun acordo de colaboración entre o centro de inclusión e o Concello, prestarán servizos de limpeza, roza e mantemento de distintas zonas axardinadas e parques da vila.
Os tres traballadores, acompañados dun coordinador, actuarán nestas zonas dous días á semana, xoves e venres, en xornada de mañá. Paco Ferreira destacou que “con este acordo de colaboración melloramos o servizo de limpeza e mantemento de parques, xardíns e beirarrúas e ademais colaboramos cunha entidade, o Centro Juan María, que fai unha labor tan importante”. O rexedor aproveitou a visita para darlles “unha benvida moi agarimosa e desexarlles o mellor no desempeño da súa labor”.
