Baiona realiza melloras nas instalacións do Pavillón Municipal de Deportes

O Concello de Baiona realizou intervencións para mellorar as instalacións do Pavillón Municipal de Deportes. A través da Concellería de Deportes instaláronse protectores na parede e nas columnas na zona perimetral da cancha de xogo do Pavillón Municipal co obxectivo de reforzar as condicións de seguridade para as persoas que utilizan a diario as instalacións.

Carlos Gómez Prado, Alcalde de Baiona, destaca que “é fundamental manter en bo estado as instalacións deportivas se queremos ofrecer un bo servizo ás persoas usuarias e contribuír así en mellorar a calidade da actividade deportiva no noso concello. As obras de mellora que se acometeron no polideportivo están encamiñadas a reducir riscos e buscan evitar posibles golpes e impactos dos xogadores, técnicos e árbitros durante os adestramentos e as competicións deportivas. Tamén se instalou un novo xogo de porterías de fútbol sala/balonmán con sistema anti envorco así como as súas correspondentes redes. Todo iso supón un investimento de 7.254,50 euros que reverterá na mellora substancial da seguridade no terreo de xogo”.

O rexedor baionés destacou que “estamos a cumprir os nosos compromisos co deporte investindo nas instalacións co fin de mellorar a práctica deportiva no noso municipio”.