Baiona celebrou este sábado na praia da Ribeira unha nova edición do xa tradicional Torneo de Pas Praia 2×2, organizado pola Concellería de Deportes. A competición comezou ás 10:00 da mañá, xogándose os partidos clasificatorios, e xa pola tarde, os cadros eliminatorios, coas semifinais e a gran final. O torneo, que cumpriu a súa XIX edición, foi un éxito de participación, con 40 equipos inscritos, máis de 100 deportistas e un notable número de seguidores ao longo de todo o día.
Divididos en 8 grupos de 5 parellas, clasificáronse para a fase final do torneo os dous mellores de cada grupo, mentres que para o cadro de consolación pasaron os terceiros e cuartos. Os últimos de cada grupo quedaron eliminados. O XIX Torneo de Pas Praia desenvolveuse en tres pistas instaladas no areal, co único propósito de divertirse e realizar actividade física. Ademais, todos os participantes recibiron bocadillo e bebida como de costume para gozar dun día de praia.
Ao finalizar a competición, o alcalde de Baiona, Carlos Gómez, e a concelleira de Deportes, Miriam Costas, foron os encargados de entregar os agasallos e trofeos conmemorativos ás parellas participantes nesta edición.
O cadro de vencedores nesta XIX edición foi o seguinte:
CADRO FINAL
- Campións – Head Soccer
- Subcampións – Vigo Bao
- Semifinalistas – Os Resesos
- Semifinalistas – Paciencia
CADRO DE CONSOLACIÓN
- Campións – Presidentes
- Subcampións – Santos
- Semifinalistas – Mito y Yudi
- Semifinalistas – Pet House
