O domingo 24 de xullo, a partir das 21:00 horas, o Pazo das Pías de Nigrán converterase no escenario dun novo concerto da terceira edición do programa “Música no Ar”, que a Deputación de Pontevedra, neste caso coa colaboración do Concello de Nigrán, ten en marcha co obxectivo de levar a música clásica a espazos patrimoniais da provincia como pazos, mosteiros, igrexas, bens de patrimonio industrial, conxuntos etnográficos e espazos protexidos cheos de maxia e historia. As persoas interesadas en acudir a esta cita poderán asistir sen reserva, xa que a entrada é libre ata completar aforo.
A velada estará protagonizada pola soprano viguesa Begoña Salgueiro e finalmente o pianista Sergio Kuhlmann (por causa maior finalmente non pode ser a ferrolá Andrea García inicialmente anunciada). “Música no Ar”, enmarcado no amplo programa da Deputación, “Con-Fiando Cultura” ten como meta promover e garantir o acceso igualitario á cultura para todos e todas, amais de poñer en valor espazos da memoria, da arte e da identidade.
