A sexta edición de Vive Nigrán arranca este venres con 11 concertos e actividades para todos os públicos

O festival Vive Nigrán arranca este venres a súa sexta edición no campo de fútbol de Monte Lourido, cunha ampla programación para todas as idades e actividades complementarias. Rigoberta Bandini, Iván Ferreiro e La Bien Querida encabezan un cartel que se completa cos concertos de Niña Polaca, Colectivo da Silva, Grande Amore, o Concerto Vibra Mahou de Cariño e as sesións DJ de COOL NENAS e EME DJ. Á programación desta edición súmase unha xornada extra, Vive Nigrán [+] co concerto de Miguel Ríos & The Black Betty Trio, na que será unha cita imperdible cunha lenda viva da música española. O festival volve a unha contorna privilexiada xunto a Praia América, coa colaboración do Concello de Nigrán. Os abonos e as entradas para a xornada do sábado están esgotados. As entradas para o venres e o domingo están dispoñibles en http://www.vivenigran.com e Ataquilla.

A sexta edición presentouse este martes en Nigrán, fronte á escultura de Balmi, realizada con residuos mariños e doada en 2021 polo festival ao Concello de Nigrán, coa presenza de Juan Rivas, director do festival, Hugo Pérez, Brand Manager de Mahou San Miguel en Galicia, José Luis Fernández Astray, director de comunicación de Gadis, Marián Lago Torrado, xefa de servizo de Aqualia Nigrán, Jacobo Sutil, director da Axencia Galega das Industrias Culturais, AGADIC, Marta Fernández-Tapias, delegada da Xunta de Galicia en Vigo, Carlos López Font, deputado provincial da Deputación de Pontevedra, e Juan González Pérez, alcalde de Nigrán.

Na súa intervención, Juan Rivas, director do festival destacou o éxito desta edición na que “a uns días de arrancar xa se esgotaron as entradas para o sábado e os abonos e só quedan as últimas entradas para o venres e para o concerto de Miguel Ríos do domingo, que vai ser moi especial”. O Brand Manager de Mahou San Miguel en Galicia, Hugo Pérez, reafirmou o compromiso da marca con Vive Nigrán e destacou o esenciais que son os encontros sociais para vivir mellor “e iso é algo que tamén nos dá a música. Por iso, a través de Vibra Mahou, a plataforma musical de Mahou Cinco Estrellas, achegamos ás persoas en torno ao directo”. Con este propósito, a cervexeira completou o cartel deste ano de Vive Nigrán co Concerto Vibra Mahou de Cariño, o sábado 16 de xullo. Carlos López Font, deputado provincial remarcou o compromiso do festival, que forma parte dos Rías Baixas Fest, coa sustentabilidade, con diversas propostas e actividades desenvolvidas para preservar a contorna onde se celebra, e tamén coa igualdade, con accións específicas durante a celebración do mesmo. Pola súa banda, Marta Fernández-Tapias, delegada da Xunta de Galicia en Vigo, destacou a implicación da Xunta de Galicia desde Fest Galicia co festival, “cun cartel de novo impresionante, e que conta nesta edición con Iván Ferreiro, un dos mellores exemplos de talento galego, tocando na súa casa”, unha “cita ineludible”, sinalou, para o público festivaleiro. Juan González, alcalde de Nigrán insistiu no especial e único da contorna privilexiada, onde se desenvolve o festival, a poucos metros do mar.

O festival arrancará o venres 15 de xullo co galego Grande Amore que presentará o seu primeiro disco no escenario Xacobeo a partir das 19:15 horas, con sons electrónicos e industriais, pinceladas ás veces macarras e ás veces tenras, pero sempre cheas de personalidade. Os andaluces Colectivo Da Silva chegarán coa súa mestura de estilo naïf, festa e rebeldía pop ao escenario Mahou desde as 20:30 horas e Karavana ofrecerá un directo cheo de enerxía no escenario Xacobeo desde as 22:00 horas. Na noite do venres, Iván Ferreiro repasará os éxitos da súa carreira con Piratas e en solitario, a partir das 23:30 no escenario Mahou, dentro dunha xira moi especial coa que volve este 2022 acompañado da súa banda habitual. Cool Nenas pecharán a primeira xornada con temazos, baile e actitude; os ingredientes escollidos por dani, Mariagrep e Kimberley Tell, a partir das 01:00 horas, para crear a festa perfecta.

A programación do sábado 16 arrancará con Niña Polaca que abrirán o festival no escenario Xacobeo trasladándonos ao Madrid dos oitenta a través das súas cancións pop con toques indie-rock, a partir das 19:15 horas. La Bien Querida acompañada da súa banda ao completo ofrecerá un dos seus concertos máis especiais no escenario Mahou, desde as 20:20 horas nunha xornada onde as mulleres serán protagonistas no cartel. O plan do sábado complétase co Concerto Vibra Mahou da banda de pop feminino Cariño, un sopro de aire fresco e descarado nun concerto incluído no abono do festival, no escenario Mahou a partir das 22:00 horas. Rigoberta Bandini fará vibrar ao público de Nigrán na noite do sábado desde o escenario Xacobeo desde as 23:45 horas con hits tan coreados como “Perra”, “Too many drugs”, e “Ay mamá”, convertido en todo un himno. Con millóns de escoitas e visualizacións dos seus temas, posicionouse como unha das artistas españolas con máis presenza a nivel internacional. Para pechar o festival, EME DJ, unha das DJ españolas cunha traxectoria máis recoñecida na escena indie-pop, fará bailar a todos os presentes en Monte Lourido.

O festival engade unha xornada extra, o domingo 17 de xullo con Vive Nigrán [+], unha cita imprescindible para os amantes da música en español, que traerá ata Monte Lourido a Miguel Ríos & The Black Betty Trio, co concerto Xacobeo desde as 22:30 horas, nun show co público sentado, no escenario Xacobeo, e que busca unir a varias xeracións que gozaron deste artista indiscutible. Os abonos e as entradas para venres e sábado e tamén para a xornada extra Vive Nigrán [+] do domingo están á venda en http://www.vivenigran.com e http://www.ataquilla.com.

Nesta edición do festival habilitáronse as pulseiras cashless como medio único de pago, tanto na zona de barras como nas foodtrucks. As pulseiras facilitaranse no momento de acceso ao recinto no punto de validación de pulseiras e poderanse recargar no interior, tanto con efectivo como mediante tarxeta bancaria. Tamén se activará un link para a devolución do saldo non consumido, a partir do luns 18 de xullo.

ACTIVIDADES PARA TODOS OS PÚBLICOS

Desde o seu nacemento, Vive Nigrán é moito máis que música e busca a integración coa contorna e o patrimonio. E por iso, nesta edición volven as actividades complementarias con propostas para todos os públicos a través das accións de Vive Sostible, Vive Patrimonio, Vive Igualdade e Vive Activo, realizadas coa colaboración da Deputación de Pontevedra, dentro do programa Rías Baixas Fest e o Concello de Nigrán.

Este xoves 14 de xullo está programado un concerto dentro de Vive Patrimonio, a partir das 20:00 horas, no Esteiro da Foz, fronte ao cinema da Ramallosa, con acceso gratuíto ata completar aforo, onde os alumnos da Escola de Rock Gain Over de Nigrán serán os protagonistas. Ademais como artistas convidadas estarán Xía Rodríguez e Sara Sanmartín, do programa “Descúbreas” da Deputación de Pontevedra. O programa incluíu tamén un roteiro guiado por Monteferro o pasado 6 de xullo, dentro de Vive Patrimonio, coa colaboración do Concello de Nigrán.

O sábado 16 de xullo as actividades chegan ás praias. Dentro da programación de Vive Activo están previstos un roteiro de kaiak e pádel surf en colaboración co Club Marítimo de Panxón, no peirao de Panxón, e que xa esgotou as súas prazas dispoñibles. E un bautismo de surf (sábado pola tarde) en colaboración con La Conservera del Surf, na praia de Patos (cun custo de 5€ por persoa cada unha e idade mínima 5 anos). Para esta actividade aínda hai prazas dispoñibles e a inscrición realízase a través do correo electrónico comunicacion@vivenigran.com para quen dispoña de entradas ou abono para o festival.

O festival conta co patrocinio da Deputación de Pontevedra, a través da súa marca “Rías Baixas Fest” e da Xunta de Galicia, a través de “FEST Galicia”, e en 2022 volve ter unha vez máis o apoio de Gadis, Aqualia e Vibra Mahou, a plataforma musical de Mahou Cinco Estrellas que xera encontros ao redor da música en directo.