A delegación baionesa de artistas en Pornic constrúe un “Flash-Arte” con alumnado francés

A delegación baionesa de artistas que viaxou ata Pornic con motivo da “Exposition d’artistes de Baiona” enmarcada na celebración do XXV aniversario do irmandamento entre as Vilas promovida pola asociación de Jumelage de Pornic na Maison du Chapître en Pornic do 12 ao 20 xuño de 2022 en colaboración cos Concellos de Baiona e Pornic, segue inmersa en numerosas actividades na vila irmá francesa.

Este encontro enmárcase dentro do interese de ambas as dúas corporacións e a veciñanza das dúas localidades de manter vivo o irmandamento. Entre estas actividades enmárcase o obradoiro flash arte que os artistas baioneses, Caíno Vasconcellos (Pintura), Irene Silva (Gravado), Víctor Lorenzo (Pintura), Carlos Padín (Pintura) e Nieves Loperena (foto-reportaxe) levaron a cabo no colexio francés de San José.

Trátase dunha actividade complementaria á exposición. Baixo a dirección da artista Irene Silva construíuse a instalación “Flash-Arte” coa participación activa do alumnado do colexio da vila irmá. “Mediante un breve aceno deixaremos unha pegada indeleble na memoria a través do paradoxo dun acto fugaz”, sinala a artista local.