Na mañá deste venres representantes dos Círculos do Val Miñor reuníronse con Meli Vázquez, portavoz de Podemos Vigo, para coñecer de primeira man “a terrible agresión que sofre o litoral de Cabo Estai”.
“O proxecto urbanístico que desolou esta zona da costa de San Miguel, consiste na construción de 6 chalés e un viario de acceso, que aínda que conta coas licenzas municipais precisas, non cumpre coa normativa vixente de costas. Esta non é a única causa para considerar este proxecto de dubidosa legalidade, xa que o viario de acceso a estas parcelas construíuse en terreos particulares de veciñas e veciños de San Miguel de Oia”, aseguran desde a formación morada.
Por todo o anteriormente exposto, os Círculos da área metropolitana de Vigo únense á loita da veciñanza de San Miguel de Oia asistindo tamén á concentración que se celebrou este sábado no propio lugar dos feitos.
