As obras de humanización da praza Rosalía de Castro de Gondomar xa teñen adxudicataria. A empresa Prace, Servicios y Obras SA encargarase de executar os traballos por 664.700 euros nun prazo de catro meses tras ser elixida o pasado venres entre un total de catro candidatas, Civis Global, Covsa e Excavaciones y Construcciones Manuel Pérez Portela S.L. Se as actuacións van segundo o estimado estarán rematadas ás portas das Festas Patronais de San Bieito, cuxa igrexa tamén está no punto de mira das humanizacións. A reordenación do centro urbano exposta polo alcalde Paco Ferreira culminará aquí baixo unha cuarta fase, aínda que polo momento non hai data fixada para a súa tramitación.
As intervencións que afectarán a 2.500 metros cadrados no punto de confluencia do Miñor e o Zamáns teñen como obxectivo dar continuidade ao plan local ideado para dar protagonismo aos seus veciños en detrimento do vehículo privado, e que xunto á praza Paradela e a rúa Manuel Alonso supoñerán máis de 7.500 metros peonalizados.
Unha das prioridades do Goberno local é que se dea comezo ás intervencións de maneira inminente, precisamente a dirección de obra xa visitou a zona e ultima os trámites para instalarse na contorna da praza de abastos, algo que podería producirse esta mesma semana. De ser así a localidade situaríase como unha das primeiras da provincia en poñer en marcha o Plan Reacpon da Deputación, que financia o 80% do montante total.
As melloras non só limitaranse á superficie, senón que contemplan a renovación integral da rede de saneamento, que pasase a ser separativa, abastecemento e o soterrado do tendido eléctrico e de telecomunicacións. Ferreira aclarou que o espazo non quedará completamente excluído ao tráfico rodado, aínda que si moi limitado. Reservaranse prazas para carga e descarga, a persoas con mobilidade reducida e servizos de emerxencias, ademais estase estudando a posibilidade de establecer outras en rotación. “Estamos a deseñar un municipio baseado no modelo Agora, é o que buscamos, un pobo pensado para a xente, para o lecer e para xerar zonas de recreo afastadas dos coches”, remata.
