Baiona recibe unha subvención de 49.136,16€ para a contratación de vítimas de violencia de xénero

O Concello de Baiona recibe unha subvención de 49.136,16€ para a contratación durante 12 meses de dúas vítimas de violencia de xénero. Yasmina Moreira, concelleira de Igualdade, salienta que “este é o terceiro ano que obtivemos subvención para contratar a vítimas de violencia de xénero”.

Dende o ano 2020 ata o de agora o Concello de Baiona recibiu da Secretaría Xeral de igualdade 146.620.80€ para a contratación de mulleres vítimas de violencia de xénero. Grazas a esta liña de subvencións, catro mulleres se beneficiaron e dúas se beneficiarán este ano dos contratos que lles permitirán acadar unha maior estabilidade persoal, social e laboral.

Estas axudas son un impulso para as mulleres que veñen de vivir situacións de violencia que a miúdo van ligadas a unha dependencia económica dos seus agresores, tendo en conta tamén que a maioría delas teñen menores ao seu cargo. A subvención concedida enmárcase nas axudas para o fomento da contratación de mulleres que sofren violencia de xénero convocadas pola Secretaría Xeral de igualdade.