Esta fin de semana celebrouse no Pavillón de As Travesas en Vigo a XIV Copa Galicia Internacional e I Trofeo Cidade de Vigo de Ximnasia Acrobática Absoluto e Base, na cal participaron máis de 600 ximnastas de Portugal, Valencia, Madrid, Asturias, Canarias e Galicia. O Gondomar Acro Club participou con 4 equipos, os cales se enfrontaban á súa primeira competición internacional e de tempada.
Os resultados conseguidos foron moi bos, logrando un bronce na categoría de trío alevín base formado por Helena Veiga, Aroa Araujo e Candela Alonso. O outro trío feminino da mesma categoría formado por Inés Román, Nerea Gallego e Lara Cabral quedou na sexta posición con tan só 0,4 décimas de diferenza entre elas. Na categoría de parella feminina alevín base, Claudia Comesaña e Sira Cedeira quedaron en 5ª posición, do mesmo xeito que Lía Hermida e Beira Fernández na categoría júnior base.
Ademais de superar con éxito a competición, a adestradora Cristina Castro como a ximnasta Lía Hermida estreáronse como xuízas. “Imos para casa con moitísimas ganas de seguir traballando para as seguintes competicións. Viñamos a esta competición co obxectivo de gozar da experiencia e fixémolo con fartura. Equipos novos, ximnastas que debutaban con 7 anos recentemente cumpridos…, un comezo de tempada con tropezos nos adestramentos por Covid, lesións… e é que non podo estar máis orgullosa, somos un gran equipo, ximnastas, adestradoras e familias”, apunta Cristina.
