Cando chega o Entroido case todo vale, as risas e as mofas esténdense por todos os recunchos da comunidade baixo un ambiente festivo cargado de tradición e ancestralidade. En Galicia é unha das festas de máis arraigamento e aínda que Ourense leve a palma, os personaxes máis característicos superan o centenar, todos con historia propia, distribuídos ao longo e ancho das catro provincias. En Verín están “Os Cigarróns”; en Laza, “Os Peliqueiros”; en Viana do Bolo, “Os Boteiros”; en Covelo, “O Rei e Os Danzantes”; en Vigo, “Os Merdeiros”, na Veiga, “Os Charrelos” e así un longo etcétera.
Desde o 4 de febreiro, o Multiusos de Sabarís permite realizar unha viaxe a golpe de vista por máis cincuenta enclaves que presumen de figuras propias do Entroido, grazas á exposición do pintor vigués Carlos Padín Avendaño. Á mostra presentada inicialmente hai exactamente dous anos na Confederación de Empresarios de Pontevedra baixo o título “Personaxes do Entroido Galego” súmanselle outra vintena de óleos á auga, un total de 52 obras das que o seu autor asegura que non serán as últimas. “Existen ao redor de 130 figuras en toda Galicia e agora mesmo teño en proxecto algo máis dunha vintena”, adianta o artista.
A súa colección parte dun traballo de campo, cámara en man o pintor vigués leva percorrendo desde fai tres anos os diferentes pobos que gozan desta tradición para inmortalizar os momentos máis significativos, que logo transmite ao lenzo cunha técnica propia marcada polas pinceladas e cores moi vivas como retratos que transmiten unha historia. “Están traballadas para sacar adiante un personaxe, aínda que debo destacar que teñen moita forza por eles mesmos”, explica Padín, mentres matiza que en moitos casos a figura principal vai acompañada de compañías “que tamén forman parte do Entroido de cada pobo”.
Cada obra conta cun pequeno texto descritivo pensado para meter en contexto aos asistentes, que teñen ata o 6 de marzo para facer un percorrido por gran parte do Entroido galego aglutinado en pouco máis de 700 metros cadrados. Padín prevé que para 2023 a súa serie creza ata as 72 representacións. “Vai un pouco en función das imaxes que atope e dos Entroidos que poida fotografar porque ás veces é difícil”, remata.
