Desde este venres o Vigo-Rías Baixas inicia a defensa da súa coroa. Gañador o ano pasado da Clasificación Elite da Real Federación Española de Ciclismo (RFEC), o proxecto presidido por José Luis Chamorro abre a tempada 2022 na Volta ao Guadalentín. O conxunto flúor competirá durante tres días na Rexión de Murcia tras estar concentrado en Mondariz-Balneario.
As magníficas instalacións do Hotel CEMAR exerceron durante sete días de cuartel xeral no habitual stage que o Vigo-Rías Baixas leva a cabo cada ano antes de poñerse en marcha no calendario Elite-Sub23. A convivencia serviu para realizar adestramentos en grupo polas estradas do sur da provincia de Pontevedra, así como para planificar a tempada. Ademais, os ciclistas visitaron as instalacións de varios patrocinadores, recibiron á presidenta da Deputación de Pontevedra, Carmela Silva, e o staff do club impartiu charlas sobre aspectos como nutrición e comunicación.
Catro corredores que este inverno incorporáronse á escuadra con sede en Vigo forman parte do “sete” que disputará a Volta ao Guadalentín. O catalán Marcos Navarrete, o asturiano Martín Barrero, o galego Ramón Fernández e o segoviano Marcos García terán como compañeiros a tres ciclistas que continúan no persoal flúor: Pablo Ara, Andrés Taboada e Asier González.
A menos dun mes para que arranque a Copa de España, o primeiro test desta campaña presenta un percorrido do máis completo. A Volta ao Guadalentín empeza este venres en Águilas cunha contrarreloxo individual de 7,25 quilómetros. O sábado será Lorca o escenario dunha etapa rompepernas de 158 km e o domingo a loita pola xeral decidirase na subida ao porto de 1ª categoría de Cabezo da Xara, punto final dun percorrido de 136 km.
