O Concello de Nigrán tramita oficialmente desde inicios de mes de novembro a petición de licenza da firma compostelá “Argenta Capital S.L.U.” para construír unha residencia de maiores en Porto do Molle con capacidade para 90 usuarios. Esta situarase na futura zona de servizos e ocio recreativo do parque empresarial, entre a rúa do Xial e Barreira, nunha parcela de 4.229 metros cadrados. O orzamento total deste proxecto ascende a case 3 millóns de euros, correspondéndose 1,6 millóns a esta construción cuxa edificabilidade total ascende a 2.429 metros cadrados distribuídos en tres plantas (soto, baixa e primeira) e 340.000 € ao terreo.
“É unha boísima nova para Nigrán porque gañaremos dentro do noso municipio prazas asistenciais, algunhas delas concertadas, e ao mesmo tempo xerará emprego”, subliña o alcalde, Juan González, en referencia á escaseza de oferta pública en toda a comunidade e á previsión de xerar mínimo 30 postos de traballo directos. “Para min é especialmente importante que as persoas maiores de Nigrán non se teñan que desvincular da súa contorna trasladándose a residencias de fóra incluso da provincia como está a acontecer, isto tamén forma parte de o Nigrán para todos que estamos a construír”, sinala.
Polo que respecta á distribución, consta de soto, planta baixa e primeiro andar. Na planta baixa sitúase a área de dirección-administración que inclúe unha zona de recepción e outra de despacho de recepción e tamén se proxectan 15 dormitorios dobres, salas de convivencia, comedor, zona de rehabilitación, aseos, enfermería, cociña, almacén… Nesta planta hai soportal e acceso lateral ao xardín. Xa no primeiro andar sitúanse outras 30 habitacións dobres, comedor, aseos e despacho. Todos os dormitorios da futura residencia miden 17,5 metros cadrados e os seus correspondentes baños 5,05. Finalmente, no soto sitúase a lavandaría, mortuorio, vestiarios de persoal e zonas de almacén.
Centro Social para maiores
Paralelamente, mentres os servizos técnicos tramitan a licenza, o Concello está a construír un centro social para maiores nas antigas casas dos mestres de Vilameán, en pleno núcleo urbano. Os traballos, cun orzamento de 110.064 € incluídos no Plan Concellos 2020 da Deputación de Pontevedra, estarán rematados a inicios de ano. Ata agora este espazo era empregado como almacén de alimentos dos Servizos Sociais, trasladándose esta función á antiga casa do conserxe do CEIP Humberto Juanes grazas ás facilidades dadas pola dirección do centro.
O goberno local tomou a decisión de cambiar o seu uso despois de que un nutrido grupo de mulleres trasladase o ano pasado ao alcalde, Juan González, a súa demanda de máis servizos destinados aos maiores no propio centro urbano. Tras manter diversos encontros co rexedor e co arquitecto redactor o proxecto contempla as súas principais peticións: dispor dun lugar adaptado e confortable destinado á convivencia e onde, ao mesmo tempo, poidan manter reunións, consultar a prensa ou internet e realizar actividades.
O volume orixinal do edificio non se modificará, tan só se mellorarán os acabados renovando a cuberta e limpando as fachadas, polo que a súa relación coa contorna non variará. O obxectivo paralelo desta reforma é poñer en valor a planta orixinal, moi desvirtuada por sucesivas reformas e que volverá a responder á tipoloxía de “Casas dos mestres” dispersas por toda a comarca do Val Miñor. Isto último implica demoler a totalidade da tabiquería interior para crear espazos diáfanos. A parte norte do edificio disporá de aseos adaptados e unha sala de reunións, mantendo os ocos na fachada para conservar esa iluminación natural. A parte sur servirá para un uso máis polivalente, cun espazo visualmente aberto que terá mesas, zona de consulta de prensa ou internet e/ou de descanso informal con sofás.
