Baiona suspende a programación do Nadal no Auditorio Municipal e no Multiusos de Sabarís

O Concello de Baiona decidiu suspender os actos organizados no Auditorio Municipal V Centenario e o Multiusos Mercado de Sabarís ao supoñer estes aglomeracións de persoas en sitios pechados. Neste sentido, prevese tan só a celebración das actividades e eventos que se celebren ao aire libre, ata novo aviso. Unha decisión que se acordou motivada pola alta incidencia do Covid na poboación.

Ante o cal, o Alcalde, Carlos Gómez Prado, comenta que “é momento de actuar con responsabilidade e ante a actual situación, na que se rexistra un incremento considerable de contaxios no noso municipio, consideramos que é contraproducente celebrar eventos e actos que comporten congregación de xente en espazos pechados. Non foi unha decisión fácil pero nestes días debe prevalecer a saúde pública e actuar con prudencia segundo as recomendacións feitas polas autoridades sanitarias”.