O alumnado do Conservatorio Municipal de Gondomar ofrece o seu tradicional Concerto de Nadal

O Conservatorio Municipal de Gondomar ofrecerá o mércores, 15 de decembro, o seu tradicional Concerto de Nadal. A actuación, que correrá a cargo dos alumnos e alumnas do 4º curso do centro, comezará ás 18:00 horas na Praza do Concello. Un ano máis non esquece o seu espírito solidario e convida ao público asistente a levar un quilo de alimentos non perecedoiros para entregar ao banco municipal de alimentos, que xestiona o departamento de Benestar Social.

Afinan os violíns, guitarras e todos os instrumentos para que soen á perfección o vindeiro mércores nesta tradicional cita para eles como é o Concerto de Nadal, no que mostran ao público as súas aptitudes e a súa capacidade como futuros e futuras músicos e músicas moitos deles e delas.

Acompañados polos seus profesores e profesoras, o alumnado realizará varias intervencións individuais que completarán o programa cunha intervención ensemble de guitarras, outra de violíns e de ventos. Como é habitual tamén se poderá gozar da actuación do coro. O peche da actuación correrá a cargo de toda coa tradicional panxoliña que cada ano regalan nas súas actuacións.

Ao acto asistirá o alcalde de Gondomar, Paco Ferreira, así como representantes do goberno local. O rexedor lembra “que é fundamental o labor que se realiza no conservatorio onde mozos e mozas descobren moitas veces a súa verdadeira vocación, o centro que foi trampolín de músicos e músicas que levan xa o nome de Gondomar por toda España”.