O Val Miñor apoia a manifestación en defensa da sanidade pública do próximo 14 de novembro

Esta mañá tivo lugar na Ramallosa unha rolda de prensa convocada pola Plataforma en Defensa da Sanidade Pública do Val Miñor, que forma parte de SOS Sanidade Pública e tamén do comité organizador da mobilización convocada o próximo domingo 14 de novembro en Santiago de Compostela, baixo o lema de Salvemos á Atención Primaria.

Explicáronse as actividades que está a realizar para informar da situación na que se atopa a Atención Primaria na comarca do Val Miñor, a través das mocións de apoio á manifestación, presentadas nos concellos de Nigrán, Baiona (xa aprobada) e Gondomar, charlas informativas, reparto de propaganda informativa e cartaces informativos.

“E porque sobran os motivos invitamos á cidadanía do Val Miñor a participar masivamente na manifestación o día 14 de novembro, ás 12:00 horas na Alameda de Santiago de Compostela. A presión social é a única forma de facelos desistir das súas intencións de recortar a Atención Primaria. De Nós depende”, sinalan desde a Plataforma en Defensa da Sanidade Pública do Val Miñor.

Haberá autobuses gratuítos para asistir á mobilización en Santiago. Teléfonos de contacto, Nigrán 629207579; Baiona 609801138; Gondomar 629866335.