Nigrán engalana os dous cemiterios municipais de cara á festividade de defuntos

O Concello de Nigrán engalana con máis de 200 plantas os seus dous cemiterios municipais, o de Parada e Nigrán, de cara á festividade de Todos os Santos. Aos tradicionais crisantemos brancos, amarelos, morados e ocres engadíronse este ano por vez primeira azaleas e alegrías vermellas, rosas e brancas. En Nigrán (San Fiz) as flores foron colocadas sobre media ducia de grandes maceteiros trasladados para a ocasión, mentres que en Parada plantáronse o xoves directamente na terra.

“Queremos manter os dous cemiterios en perfecto estado durante todo o ano e así o estamos a facer, pero de cara á festividade de defuntos, que é cando máis visitas reciben, é tamén importante que o Concello estea á altura e os engalane”, argumenta o alcalde, Juan González, quen sinala a construción de novos nichos en ambos camposantos e a regularización de todos os cemiterios do municipio como un dos mellores exemplos da preocupación do goberno local por estas instalacións.