Máis de 200 persoas participaron na concentración convocada pola Plataforma en Defensa da Sanidade Pública de Gondomar, diante do antigo Centro de Saúde, en defensa dunha sanidade pública e de calidade no municipio. Na mesma se solicitou á Xunta de Galicia a apertura real do Centro de Saúde de Gondomar, con consultas presenciais e unha atención 100% presencial a través do desdobramento das consultas e o incremento do cadro de persoal; a mellora da accesibilidade, acabando coas listas de agardas, reducindo as listas a un máximo de 24-48 horas; incremento de persoal en todas as categorías en base os datos poboacionais; e o incremento do presuposto sanitario en Atención Primaria, que hoxe se atopa no 12%, ata conquerir o 25% do gasto total sanitario.
