Gondomar participa esta fin de semana no proxecto do “Xacobeo 2021” coa realización dunha “Alfombra Mundial” no Atrio da Igrexa de San Bieito, realizada pola Asociación de Mulleres Rurais San Bieito. Esta iniciativa está impulsada pola Comisión Xestora de Entidades Alfombristas do Camiño de Santiago, da que os alfombristas da Vila Condal son membros fundadores, e á que se uniron alfombristas de máis de duascentas sesenta cidades repartidas nos cinco continentes nunha trintena de países.
Cada cidade realiza a súa alfombra seguindo a súa propia técnica e estilo, utilizando os materiais que prefiran pero todas representan un deseño común creando un tapiz efémero. O deseño céntrase no símbolo xacobeo por excelencia: a cuncha de vieira, identificación dos peregrinos e do Camiño de Santiago e que foi creado polo alfombrista de Chinchón, Miguel Angel Lagoa Villalobos. En cada alfombra aparece o nome da cidade de realización e a frecha amarela indicando os quilómetros que a separan da meta do Camiño: Santiago de Compostela.
O obxectivo principal deste proxecto é a difusión, divulgación e promoción do Camiño de Santiago e do patrimonio material e inmaterial vinculado a el, destacando a riqueza cultural, natural e humana do Camiño de Santiago. A mesma alfombra realizarase ao mesmo tempo a escala mundial en distintos lugares, a modo de flashmob de arte efémera, na véspera e día grande do Apóstolo Santiago.
Coa intención de impulsar o Xacobeo do 2021 creouse o 16 de xullo de 2019 a Comisión Xestora de Entidades Alfombristas do Camiño de Santiago, formada inicialmente por alfombristas de Bueu, Gondomar, Tui, Redondela, Ponteareas e os asturianos de Castropol. Hoxe en día, converteuse no maior proxecto mundial de alfombrismo, coa participación de alfombristas de Alemaña, Arxentina, Austria, Brasil, Bolivia, Colombia, Chile, Costa Rica, Estados Unidos, Ecuador, Francia, Finlandia, O Salvador, Guatemala, Honduras, Hungría, India, Italia, Lituania, México, Nicaragua, Nova Zelandia, Polonia, Paraguai, Panamá, Perú, Portugal, Tunes, Venezuela e España, entre outros.
