Nigrán continúa apostando polos seus festivais, os roteiros guiados ou as citas deportivas

O Concello de Nigrán continúa este verán co seu lema “Nigrán, equilibrio natural” para presentar unha programación sociocultural de xullo chea de actividades ao aire libre, concertos, roteiros, festivais, etc. para todo tipo de públicos e gustos. As citas xa habituais do calendario estival manteranse neste 2021 coa boa nova de que festivais como Vive Nigrán (15, 16 e 17) ou Solpor Monteferro (finalmente o 22 e 23 de xullo e co aforo xa completo) regresarán ao seu lugar orixinal tras un 2020 máis marcado polas restricións sanitarias. Igualmente, neste 2021 nace un novo concepto de festival chamado “Espazos” nos pazos de Cea, Urzáiz e Touza como escenario vespertino para concertos de artistas como Taburete, Iván Ferreiro, Carlos Sadness…

“Levamos xa moitos anos dando continuidade a unha programación de verán que, incluso no 2020, conseguimos manter cumprindo a normativa sanitaria, así que este 2021 non ía a ser diferente. Con paciencia, cariño e calma chegaremos a un 2022 de plena normalidade e, por tanto, sen estes problemas de limitacións nos aforos”, destaca o alcalde, Juan González, quen novamente aposta polos roteiros ao aire libre. “A pandemia axudounos a descentralizar as opcións de ocio e a mirar cara os nosos marabillosos carreiros naturais do interior”, engade en referencia á programación de roteiros guiados todos os mércores polos diferentes sendeiros do municipio ou máis específicos como o xeolóxico por Patos-Monteferro.

Unha das principais novidades será o regreso do Vive Nigrán ao campo de fútbol de Lourido e de Solpor ao Miradoiro de Monteferro, manténdose Sona Gaifar no punto que leva o seu nome e Nigranjazz no esteiro da Foz no seu 15 aniversario o 30 e 31 de xullo. Pola súa banda, o exterior do Templo Votivo de Panxón volverá este verán a ser o gran escenario dun concerto, neste caso o do tenor José Manuel Zapata. Igualmente, Serafín Zubiri repetirá o seu concerto inclusivo “Homenaje a Nino Bravo” en San Fiz o 31 de xullo e se celebrará Santiago de Parada as súas festas patronais con Proxi. Entre as novidades musicais, o concerto da escola de rock do festival de Paredes de Coura (Portugal).

A cita estelar da travesía a nado Costa Serena este domingo día 4 de xullo marcará o inicio dunha tempada deportiva de verán onde tamén será protagonista o Campionato de España de Petanca ou o Rallie Rías Baixas e onde non faltará o torneo de volei-praia ou o ecuestre de enganches en Porto do Molle (25). Ademais, durante todo o verán ofrécense campus deportivos para os máis pequenos en colaboración cos clubs e as actividades na praia en Patos e Praia América.

Os tradicionais “Beachmarkets” en Gaifar ou artesanais en Panxón convivirán co multicultural de Praia América e con citas como o Día dos Avós o día 26 en Priegue ou espectáculo do grupo de Teatro do Ar o día 11.

“Agosto seguirá na mesma liña, mantendo roteiros e os nosos festivais, como ValMiñor Fest dedicado á cervexa artesá ou Parrulas Fest pensado nun público familiar”, resume o alcalde.

AXENDA_XULLO_NIGRÁN