O Club Baloncesto Nigrán quixo render esta mañá no Pavillón de Panxón a súa especial homenaxe a Olivia e Anna, enviando así a Beatriz, nai de ambas, un abrazo cheo de forza e agarimo. O acto simbólico tivo lugar entre os dous partidos amigables disputados esta mañá cos equipos infantil feminino e alevín mixto, partidos cuxos xogadores e xogadoras disputaron con crespón negro nas súas camisetas de xogo.
Os xogadores e xogadoras do club sentáronse na pista de xogo arroupando a dous balóns que representaban a Olivia e a Anna xunto a un lazo negro que pretendía mostrar a dor e a gran pena pola perda das dúas pequenas. Desde o club cren firmemente no papel do deporte como transmisor de valores a través do cal se pode concienciar no rexeitamento a calquera tipo de violencia e formar aos nenos e nenas na tolerancia e o respecto.
