As choivas desta fin de semana provocaron un impresionante aumento do caudal no río Miñor ao seu paso por Gondomar, con pequenos desbordamentos nalgunhas das áreas máis próximas ao seu leito, como A Coelleira e a zona do antigo matadoiro. Con todo, desde a Policía Local confirmaron que non se produciu ningunha inundación causante de incidencias que requirisen a súa intervención, a pesar das rechamantes imaxes que deixou o río ao seu paso.
