Los Abetos de Nigrán recibe o premio ao “Mellor servizo de viño en restaurante”

A Denominación de Orixe Ribeiro quixo celebrar a chegada do Nadal na novena edición dos seus Premios, reunindo de forma presencial e en liña a autoridades, xornalistas, adegueiros, viticultores e representantes de todos os estamentos implicados na cultura do viño. Los Abetos, de Nigrán, recibiu o galardón ao “Mellor servizo de viño en restaurante”.

Na súa intervención, o presidente do Consello Regulador, Juan Manuel Casares Gándara, quixo destacar que “nestes días tan especiais que se achegan debemos apostar por comprar produtos da nosa terra, no noso comercio, como forma de que o valor engadido quede aquí. Por iso, este Nadal en ningunha mesa debería faltar unha botella de viño da D.O. Ribeiro”.

A gala serviu para coñecer os gañadores da Cata Oficial, designados a cegas por un panel de expertos entre os 50 viños participantes dun total de 32 adegas.

Pazo do Mar Expresión 2019, de Adegas Pazo do Mar, é o “Mellor viño branco de adega”. O galardón ao “Mellor viño branco de colleiteiro” recaeu en Cuñas Davia 2019, de Adegas Valdavia. O “Mellor viño tinto de adega” foi para O Cotarelo 2019, de Benigno Ríos Mosquera. E, o “Mellor viño tinto de colleiteiro” é Canción de Elisa 2019, de Adega Dona Elisa.

Pero non foron estes os únicos galardóns que se entregaron. Luis L. Paadín, profesor e catador, foi nomeado “Persoeiro de Honra” da Denominación de Orixe Ribeiro e Alfonso Albor Rodríguez, da adega Pazos de Albor, recolleu o “Vida entre Vides”. Tamén foi protagonista Esther Daporta que recibiu o “Muller e Viño”, na mesma semana na que o restaurante Yayo Daporta de Cambados revalidou a súa Estrela Michelín.

Ao xornalista Francisco J. Gil, do programa Cousas para comer, recoñecéuselle no apartado de “Mellor Labor de Comunicación”. E, nas categorías reservadas aos profesionais da hostalería e venda a particulares, o “Mellor servizo de viño en restaurante”, foi para Los Abetos, de Nigrán; a “Mellor tenda de viños-vinoteca”, para Valladares en Santiago; e o “Mellor bar de viños-taberna” a Derby, en Vilagarcía.

A gala, que se celebrou no Palacio de Congresos e Exposicións de Galicia en Santiago seguindo os debidos protocolos de precaución, contou coa presenza do Vicepresidente da Xunta, Alfonso Rueda; do Presidente de Parlamento de Galicia, Miguel Ángel Santalices; do conselleiro do Medio Rural, José González; do concelleiro de Presidencia, Relacións Institucionais e Turismo do Concello de Santiago, Gumersindo Guinarte; e da directora de Turismo, Nava Castro; así como dunha ampla representación institucional dos concellos pertencentes á D.O. Ribeiro.