Baiona pasa ao nivel máximo de restricións

O comité clínico da Consellería de Sanidade que fai seguimento da evolución da covid-19 en Galicia vén de acordar, na súa reunión de hoxe pola tarde, suavizar as medidas restritivas nos concellos de Barro, Coristanco, Cee, Laxe, Carballo e Ponteceso, que pasarán ao nivel básico de restricións, co que se suprimirá a limitación de mobilidade.

Así mesmo, os concellos de Ribeira, Bueu, e Baiona, pasan ao nivel máximo de restricións, o que supón o peche da hostalería ás 17:00 horas, cun aforo limitado ao 50% nas terrazas, e reunións dun máximo de catro persoas. Ademais non será posible saír ou entrar destes municipios sen causa xustificada.

Ademais do antedito, os concellos de Santa Comba, Mazaricos, Negreira, Carnota, Rodeiro, A Illa e Fisterra, pasan ao nivel medio alto de restricións.

Igualmente, o comité clínico acordou que o concello de Santiago pasa a nivel medio e queda pechado perimetralmente.

Tras analizar a evolución epidemiolóxica no conxunto de concellos galegos, o comité clínico tamén acordou implementar unha vixilancia especial nos concellos de Verín, O Barco, A Rúa, Cedeira e San Sadurniño.

As medidas entrarán en vigor a noite do mércores ao xoves.

Sanidade lembra a obrigatoriedade de cumprir todas as medidas establecidas pola Xunta Galicia, co ánimo de mellorar a situación epidemiolóxica na comunidade e así poder ir diminuíndo as restricións vixentes.

Sinalar, por último, que mañá mércores, a Consellería de Sanidade informará do plan de Nadal para Galicia.