A frota de J80 volve este sábado á auga para inaugurar en Baiona a Liga de Outono 2020, unha competición en catro actos organizada polo Monte Real Club de Yates que se disputará entre os meses de outubro e novembro.
Serán catro xornadas regateiras (10 e 24 de outubro, 7 e 28 de novembro) que volverán reunir nas Rías Baixas aos J80 galegos, que conforman, na actualidade, unha das frotas de monotipos máis numerosas e prolíficas do panorama náutico español.
Entre eles veremos ao actual campión galego e mellor monotipo da tempada, o Okofen de Javier de la Gándara, que tratará de facerse co dobrete ligueiro tras lograr a vitoria da Liga de Inverno celebrada a comezos de ano.
Para conseguilo deberá vencer a outro dos claros aspirantes ao ouro, o Alboroto de Juan Ameneiro, do que é habitual o campión de España de J80 Javier Aguado e que nesta ocasión contará con Willy Caamaño a bordo. O equipo chega con forza á liga outonal despois de gañar este verán o Trofeo Conde de Gondomar, con tres vitorias nas tres probas disputadas.
O Maija de José Luis Pérez é outro dos candidatos ao triunfo na Liga de Outono, un título que xa logrou na edición de 2019 grazas a unha gran regularidade nos seus resultados, e que pretende revalidar neste 2020.
Entre os habituais dos campionatos de J80 do Monte Real que repetirán na liga outonal están tamén o Cansino, do que forman parte o tesoureiro e comodoro do club baionés, Fernando Yáñez e Ignacio Sánchez Otaegui; o Luna Nueva, patroneado por Juan Luis Tuero; e o Spaco de Santiago Estévez, ao que se suma nesta ocasión o que fose campión de España de catamarán F18 José Quiñones.
Competirá tamén un J80 tripulado unicamente por mulleres: o Pazo de Cea de María Campos, Rita Hernández e Cristina e María González Cominges; e outro J80 formado exclusivamente por alumnos e adestradores da Escola de Vela do Monte Real: o Miudo, que liderará Ignacio Salgueiro.
O ¡Ay Carmela! de Juan Martínez, o Due de Rafael Blanco, o Ferralemes de Rosario García, o Mondo de Bernardo Macedo, o Namasté de Luis de Mira, o Petrilla de Jaime Barreiro e o SDN Cormorán de Francisco Martínez, completarán unha frota á que se suma como novidade este ano o Luxoconf de Jean Claude Sarrade.
O francés, un dos habituais das competicións de cruceiro en Galicia e campión galego de solitarios, estrearase cos J80 na que será a última das competicións do Monte Real neste 2020, un ano no que, a pesar da situación derivada do coronavirus, o club baionés puido cumprir con gran parte das súas competicións deportivas.
A Liga de Outono empezará este sábado en Baiona coa disputa das tres primeiras probas do total de doce que hai previstas para os catro días que durará o campionato. Serán catro xornadas que se anuncian emocionantes e cunha gran rivalidade entre unha frota que foi apertando cada vez máis os resultados nas últimas competicións.
O campionato do mundo de J80 que o Monte Real Club de Yates organizará en 2023 asoma ao virar a esquina e todos buscan mellorar os seus resultados para poder disputalo ao máximo nivel.
