Nigrán adianta ás 20:00 horas o concerto inclusivo de Serafín Zubiri

O Concello de Nigrán, ante a alta previsión de choiva esta noite, adianta o concerto gratuíto do artista invidente Serafín Zubiri acompañando da pianista Brenda Vidal e a Banda de Música de Vincios, ás 20:00 horas de hoxe no campo de fútbol de Lourido (Nigrán). Será un concerto inclusivo baixo o título “Lembrando a Nino Bravo” e neste caso supoñerá unha unión de talentos musicais exposta ex-profeso para a ocasión desde “Un Nigrán para todos” para conmemorar a celebración do Día Internacional das Persoas Xordas da próxima semana.

“É unha honra recibir a Serafín Zubiri en Nigrán e máximo se o fai acompañado pola Banda de Música de Vincios e a pianista Brenda Vidal, será unha noite inesquecible chea de emocións e dedicada especialmente ás persoas con diversidade. Consideramos que non pode haber mellor maneira de concluír o verán”, sinala o alcalde, Juan González, quen incide en que, como en cada concerto, as mochilas vibratorias estarán ao dispor de toda aquela persoa que as solicite a través do mail info@entresignos.com ou no whatsapp 690679675. O evento gratuíto contará con todas as medidas de seguridade e límite de aforo.

O ano pasado, xunto a 20 persoas con diversidade funcional, Zubiri realizou o Camiño Francés a Santiago coa axuda da tecnoloxía GPS co obxectivo de facer “accesible” o roteiro a persoas con algún tipo de discapacidade, foi nesa ocasión onde probou por vez primeira as mochilas vibratorias do Concello de Nigrán e onde fraguou xunto ao propio rexedor (participante no último tramo) a idea deste concerto inclusivo. O espectáculo, co que percorreu máis de cen localidades do país, está estruturado en tres bloques nos que se fai un percorrido cronolóxico polas cancións máis coñecidas dos cinco discos que se editaron de Nino Bravo. Entre cada bloque, a banda interpretará unha canción instrumental e proxectaranse imaxes dos momentos máis importantes da carreira do valenciano. “A idea é crear un clima emocionante onde Zubiri, representante de España en Eurovisión en 1992, repasará temas emblemáticos do tamén eurovisivo Nino Bravo, como Te quiero, te quiero; Noelia; Un beso y una flor; América; Libre…”, explica González.

A vida de Serafín Zubiri estivo protagonizada pola superación a través da música e o deporte. A súa cegueira de nacemento non lle impediu sacar adiante a súa carreira como artista –editou oito discos– e fraguar un gran currículo deportivo. De feito, en 1992 foi elixido para representar a España en Eurovisión coa canción “Todo esto es la música”, e no Nadal dese mesmo ano interpretou o tema central da banda sonora da película de Disney La bella y la bestia. No ano 2000 representou a España por segunda vez no Festival da Canción con “Colgado de un sueño”, sendo seleccionado por votación popular. Como deportista, fixo incursións en distintas disciplinas, como submarinismo, paracaidismo, salto desde pontes… Aínda que especialmente atletismo e montañismo.

“É un exemplo para todos de superación e o mellor representante que podemos ter para este concerto inclusivo que expomos desde o grupo de traballo ‘Un Nigrán para todos’”, resume González, quen agradece a enorme disposición para unir talentos das tres partes: Zubiri, Banda de Música de Vincios e Brenda Vidal.