Baiona axuda a cumprir os protocolos sanitarios nas escolas do municipio

O Concello de Baiona, en colaboración cos centros educativos do municipio, implantou unha serie de medidas para protexer á comunidade escolar ante a actual situación sanitaria.

As escolas deben adaptarse a novos protocolos e actuacións polo que centros e Concello camiñan da man para garantir a súa seguridade. Entre as medidas levadas a cabo atópase a distribución de espazos nos centros. Dende o consistorio axudaron nesta tarefa mediante a cesión de valos, que permiten a correcta circulación e disposición do alumnado.

Doutra banda, entre as novas medidas orientadas a conseguir centros seguros procedeuse á recolocación do mobiliario das distintas estancias dos colexios, para manter a distancia mínima interpersoal esixida.

Durante os meses de verán o Concello de Baiona estivo traballando para preparar a volta ás aulas, sempre pendentes das actualizacións das directrices marcadas pola Xunta. Con todo, pola situación excepcional que se está vivindo, este ano tivéronse que intensificar as tarefas nos colexios, así como apostar por novas medidas cuxo fin é garantir que os centros educativos sexan lugares seguros para toda a comunidade educativa.

O concelleiro Óscar Martínez destaca que este labor é posible grazas aos operarios municipais, que teñen que deixar as súas ocupacións habituais para colaborar coas escolas: “a prioridade estes días ten que ser a mellor protección posible para as nenas e os nenos de Baiona”.

Pola súa banda, o concelleiro de Educación, Óscar Carreño, explicou que os centros precisan axuda para poder botar a andar un curso que se prevé moi complicado, e o Concello está a colaborar para que este desenvólvase correctamente, “aínda que as competencias na implantación destas medidas sexan autonómicas e non municipais”.