Bodegas La Val entrega a recadación íntegra da venda do seu “La Val Solidario 2019” á asociación Alento

Bodegas La Val, unha das marcas pioneiras da Denominación de Orixe Rías Baixas, fixo entrega hoxe aos representantes de ALENTO (Asociación de Dano Cerebral Adquirido da provincia de Pontevedra) dun cheque polo importe íntegro resultante da venda das 200 botellas da III Edición Limitada do seu albariño “La Val Solidario 2019”.

O acto de entrega celebrouse en Bodegas La Val, situada en Salvaterra de Miño e nel, Fernando Bandeira, socio e xerente de Bodegas La Val e Antonio Ruiloba, socio e administrador, entregaron un cheque por valor de 1.600 euros a Gracinda Pampillón Campos e Gonzalo Mira Villar, presidenta e xerente de ALENTO respectivamente.

Fernando Bandeira, socio e xerente de Bodegas La Val, dicía: “Para nós foi un pracer poder colaborar con Alento a través deste proxecto social e, máis aínda, dada a situación actual. Tivemos a oportunidade de visitar a Asociación e é incrible o labor que fan e tremendamente necesaria”.

Alento destinará esta doazón a un dos seus proxectos: o “Horto Ecolóxico Terapéutico”, un horto adaptado que, durante o pasado confinamento, tivo especial relevancia para as persoas pertencentes a esta Asociación.

Pola súa banda, Gracinda Pampillón, presidenta da Asociación, engadiu: “Estamos moi contentos e agradecidos por ser os beneficiarios desta III Vendima Solidaria. Foi moi bonito o desenvolvemento do proxecto: ir á adega a vendimar o pasado setembro, o posterior deseño da etiqueta de La Val Solidario 2019 na Asociación e, agora, ver os resultados. Esta acción parécenos moi necesaria e enriquecedora”.

Péchase así o ciclo iniciado coa III Vendima Solidaria, tras a venda do albariño “La Val Solidario 2019” e a entrega do cheque á Asociación Alento. O próximo setembro, co inicio da vendima e se a situación actual permíteo, terá lugar a IV Edición deste proxecto social iniciado en 2017, co que Bodegas La Val mostrar o seu compromiso coa sociedade.

2020-07-31 - La Val Solidario 2019