Nigrán pon música ao solpor con Sona Gaifar

O Concello de Nigrán presenta a súa primeira edición de Sona Gaifar coma un novo evento sonoro apoiado pola Deputación de Pontevedra a través do Plan Concellos 20202 que vén a complementala oferta musical e cultural do verán na localidade. Con dúas datas, venres 10 de xullo e venres 14 de agosto, propón sesións de escoita para as tardes e solpores de Panxón (no Espazo deportivo Dunas de Gaifar, lugar que acollerá máis eventos este verán e que se estrea con este). O ciclo propón unha selección de artistas destacados de toda Galicia, entre nomes emerxentes e outros máis consagrados: DJ’s, actuacións en vivo e, como non, tamén con foco en artistas locais de Nigrán.

A primeira sesión de Sona Gaifar tivo como invitados a 4 proxectos de artistas novos pero de gran proxección nacional e internacional. A actuación en vivo foi da man de Belém Tajes, cantante e compositora, teclado e voces do proxecto Vudú e anteriormente noutras formacións, coma os míticos Luar na Lubre. Co proxecto Vudú foi gañadora do Premio Martín Códax da Música galega en 2017 na categoría Blues/Funk/Soul. A súa proposta parte de letras chegadas da música tradicional galega con harmonías fundamentalmente Soul e R&B, música íntima, elegante para grandes-pequenos momentos.

No apartado de DJ’s e selectores musicais, abriu a sesión a xovencísima viguesa Akazie. Con herdanza musical latina e influenciada polo jazz e o hip hop, mesturando un espectro sonoro baseado na electrónica percusiva con influencias da música africana, lusófona ou árabe.

Tamén estivo Fon Kid, un dos DJ’s máis respectados e experimentados de Galicia no eido da música disco e de raíz negra (funk, soul…), residente do bar Pénjamo en Patos dende hai xa varios veráns e responsable dos eventos e programa de radio Under the Ball.

E pechando a xornada estiveron Yugen Kala, nova dupla de produtores e DJ’s vigueses, quen con tan só 16 anos veñen de editar un dos discos máis sorprendentes e mellor valorados pola crítica nacional e internacional deste 2020. Ademais, están nomeados coma finalistas na edición deste ano dos Premios Martin Códax da Música -categoría electrónica-.

A entrada ao evento foi de balde ata completar aforo. Houbo unha distribución de cadeiras e mesas para que os asistentes puideran manter a distancia de seguridade, ademais de cumprilos protocolos de seguridade vixentes.

No segundo evento do ciclo Sona Gaifar, que se celebrará o venres 14 de agosto, actuarán, entre outros, Jose González, Dll Outro e Viktor Flores.

Sona Gaifar é un evento promovido polo Concello de Nigrán co apoio da Deputación de Pontevedra e coa produción e comisariado artístico de Certain Music e o xestor cultural e DJ nigranés Víctor Flores.

El pase de diapositivas requiere JavaScript.