O hospital Povisa acolleu este xoves ás 17:00 horas a inauguración da exposición “Xuntos somos invencibles”, que mostra a través de 22 fotografías o traballo dos profesionais do grupo Ribera Salud durante as semanas máis duras da pandemia de COVID. O conselleiro delegado de Ribera Salud, Alberto de Rosa, participou no acto acompañado da directora de Operacións, Elisa Tarazona, e o equipo directivo de Povisa.
De Rosa explicou que a iniciativa levouse a cabo como homenaxe aos profesionais, pacientes e vítimas da pandemia. A mostra, que se inaugurou hoxe de forma simultánea en todos os centros sanitarios de Ribera Salud, quere poñer en valor o compromiso, a valentía, a xenerosidade e a entrega dos 6.200 profesionais do grupo, dos cales 1.500 integran o persoal de Povisa. Todas as fotografías recollen momentos e xestos de gran carga emocional e están acompañadas de testemuñas reais de profesionais e pacientes de cada hospital. “Sufrimos, como todos, pero tamén crecemos e melloramos como persoas e como profesionais. E, sobre todo, saímos fortalecidos como organización de persoas que coidan de persoas”, subliñou o conselleiro delegado de Ribera Salud durante a inauguración, que presenciaron profesionais do hospital, pacientes e visitantes.
A exposición, que se poderá contemplar no hall do hospital durante as próximas semanas, recolle unha selección de 22 imaxes realizadas durante os momentos máis complicados da pandemia. En concreto, Miguel Vizcaíno é o autor das fotografías captadas no hospital Povisa, mentres que David de Loro asina as dos hospitais de Torrevieja, Vinalopó e Torrejón.
O obxectivo de Ribera Salud é que a exposición tamén poida trasladarse nos próximos meses a centros de saúde e outros espazos públicos das localidades e áreas nas que ofrece asistencia sanitaria.
