A Asociación Española de Pediatría (AEP) remitiu un comunicado interno aos profesionais pediatras e a outros médicos, co título “Alerta sobre casos de shock pediátrico”.
Chaman á calma ás familias. O cadro clínico do que se informa nesta comunicación profesional, é moi infrecuente, e describíronse moi poucos casos en España. Destacan ademais que grazas ao modelo pediátrico español, polo que os pediatras de atención primaria son o primeiro contacto dos nenos coa sanidade -moi ben formados e xa alertados destes posibles cadros-, iso permitiríanos actuar ante os primeiros síntomas. Tal e como se puxo de manifesto na práctica clínica, seguen insistindo en que a gran maioría das ocasións a COVID-19 cursa de forma leve nos nenos.
Os casos de shock en nenos que están a coincidir temporalmente coa epidemia de COVID-19 son moi infrecuentes; o cadro clínico caracterízase por febre, vómitos, inicialmente ou pode debutar só con dor abdominal, exantema na pel, os ollos arroibados e mal estado xeral. “Non sabemos aínda a causa, pero pode estar desencadeado por infeccións bacterianas e ten un tratamento ben establecido independentemente do tipo de axente infeccioso que a cause”, indican.
A AEP lembra que este tipo de comunicacións profesionais, dirixidas exclusivamente aos sanitarios, constitúen un procedemento habitual no marco das enfermidades infecciosas, e é a maneira de informar axilmente a todos os pediatras, incluíndo tanto aos que están na primeira liña na atención sanitaria aos nenos, pediatras de cabeceira, como a pediatras das urxencias hospitalarias. “Este coñecemento fai posible un diagnóstico de sospeita cedo ante patoloxías que requiren unha intervención inmediata”.
Desde a AEP están a proceder a recompilar toda a información existente e con evidencia científica ben documentada ao redor deste cadro clínico pediátrico que se está describindo en diferentes países. “Como incidimos desde a AEP nas últimas semanas, seguimos lembrando aos pais a relevancia de que estean atentos aos síntomas de alarma dos nenos, tanto pola COVID-19 como por outras patoloxías que seguen sendo motivo de acudir ás urxencias pediátricas”.
