Mediante unha orde ministerial, o Goberno establece medidas para asegurar a subministración de carburantes nas estacións de servizo e postes marítimos en todo o territorio nacional, e con especial atención aos territorios con menor densidade de poboación, mentres se prolongue o estado de alarma.
En concreto, a orde, proposta polo Ministerio para a Transición Ecolóxica e o Reto Demográfico (MITECO), garante, de forma proporcional, que polo menos permaneza aberta unha gasolineira en todos os municipios que contan con este tipo de instalacións. Tamén se asegura que sigan activos todos os postes marítimos que fornecen ao sector pesqueiro.
A orde, asinada polo Ministro de Sanidade, Salvador Illa, como autoridade competente, subliña que as estacións de servizo e os postes marítimos constitúen un servizo esencial para poder abastecer de combustible, nestes momentos, a outros servizos esenciais como poden ser o sector primario, a cadea de distribución de alimentos ou a atención médica. A súa actividade tamén é imprescindible para os traballadores que, en cumprimento das medidas establecidas durante o estado de alarma, han de acudir ao seu posto para prestar, á súa vez, un servizo esencial, como poden ser os propios profesionais sanitarios, os que traballan en plantas de xeración de enerxía ou quen garante as telecomunicacións, entre outros.
No que respecta ás gasolineiras, a orde ministerial divídeas en tres grupos:
1. O primeiro grupo fórmano aquelas estacións de servizo que, en todo caso, deberán manterse abertas no horario que prestan habitualmente, sen poder modificalo.
Neste grupo inclúense:
Todas as estacións de servizo cun volume de vendas superior a 5 millóns de litros ao ano. Este tipo de instalacións adoitan situarse en localizacións estratéxicas e teñen alta capacidade de subministración. Dispúxose dun criterio adicional para aquelas provincias, cidades autónomas ou illas onde ningunha estación de servizo totaliza estas vendas, de forma que as principais estacións de servizo en cada un destes territorios estean incluídas.
As gasolineiras localizadas en autovías e autoestradas, fundamentais para apoiar o transporte de subministracións esenciais e, ao tempo, esenciais para os propios transportistas, ao contar con servizos como aseos, duchas e tendas de alimentación, que deben permanecer operativos conforme á Orde TMA/229/2020, do 15 de marzo.
As estacións de servizo dos hipermercados, dado que son establecementos que continúan abertos segundo o establecido Real Decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada polo COVID-19.
Aquelas instalacións automatizadas e que, por tanto, non contan con persoal para atender o servizo, cuestión que diminúe o risco sanitario.
Os puntos de reposición con contratos de hospitalidade para transportistas, xa que son necesarios para determinados condutores e frotas loxísticas porque están habilitados para o pago con determinadas tarxetas de combustible dirixidas a profesionais.
As gasolineiras que fornecen combustibles para automoción menos habituais como os gases licuados do petróleo (GLP), o gas natural comprimido (GNC) ou o gas natural licuado (GNL).
As estacións de servizo que, aínda non encaixando nalgún dos criterios previos, sitúanse en contornas estratéxicas, como poden ser hospitais ou parques loxísticos, ou en zonas non metropolitanas e, por tanto, son necesarias para achegar maior capilaridade á subministración, con especial atención á insularidade.
Das 11.676 estacións de servizo inscritas no rexistro do MITECO, cumpren cun ou varios dos criterios determinados para este primeiro grupo 4.334 estacións de servizo en todo o territorio nacional, un 37% do total. Poderán consultarse tanto na web de MITECO como en Geoportal Gasolineras.
2. Naqueles municipios nos que, como resultado de aplicar os criterios do grupo 1, non se identificaron instalacións dispoñibles, requirirase á gasolineira con maiores vendas que permaneza aberta cun horario reducido. Será necesario que cubra, polo menos, 30 horas semanais, con apertura de luns a sábado un mínimo de cinco horas cada día. No caso de que as estacións seleccionadas tivesen previamente un horario máis reducido que o fixado na orde, poderán mantelo.
Os cambios de horario das gasolineiras deste segundo grupo deberán comunicarse previamente ao MITECO para que sexa actualizado na plataforma Geoportal Gasolineras e, así, poida ser consultado polos cidadáns en calquera momento. Así mesmo, este novo horario ten que anunciarse de forma visible no propio punto de subministración.
Unhas 1.686 gasolineiras -un 14% do total- deberán abrir cumprindo estes requisitos.
3. O resto de estacións de servizo que non cumpran con algún dos criterios dos grupos 1 e 2, poderán fixar libremente os seus horarios durante o estado de alarma.
Os cambios de horario das gasolineiras deste terceiro grupo deberán comunicarse igualmente ao MITECO para a súa actualización en Geoportal Gasolineras e anunciarse no propio punto de subministración.
As relacións de estacións de servizo incluídas en cada categoría poderán modificarse durante o estado de alarma se se detectan necesidades específicas insuficientemente cubertas.
Postes marítimos
A orde tamén fixa medidas para os 77 postes marítimos dedicados á subministración de combustibles a embarcacións pesqueiras, imprescindibles para o sector primario e o funcionamento da cadea de distribución de alimentos. Todos eles deberán permanecer abertos no seu calendario e horario habitual.
A páxina https://www.miteco.gob.es/es/ministerio/medidas-covid19/ recollerá a relación dos postes marítimos, que tamén está dispoñible no portal do Ministerio de Agricultura, Pesca e Alimentación e en Geoportal Gasolineras.
As medidas establecidas na orde publicada hoxe, sábado 11 de abril, son coherentes coas dispostas para o estado de alarma por outros ministerios, como o Ministerio de Transportes, Mobilidade e Axenda Urbana para garantir a correcta prestación dos servizos de transporte de bens esencial por estrada, ou do Ministerio de Agricultura, Pesca e Alimentación para asegurar a continuidade da actividade do sector primario e a cadea de distribución de alimentos.
Toda a información estará dispoñible para o cidadán na páxina web do MITECO e, de forma xeolocalizada, na páxina web en Geoportal Gasolineras.
