A residencia da canteira do Real Club Celta, situada en A Sede, recobra actividade tras varias semanas de quietude e silencio, e para estas instalacións non existe mellor uso que o que vai ter de inmediato. O club e a Fundación puxeron hai uns días ao dispor do Sergas a súa residencia da canteira e a Clínica de A Sede e, en coordinación con este organismo sanitario e tras o acordo de colaboración alcanzado coa Área Sanitaria de Vigo, a residencia convértese desde hoxe en aloxamento para persoas que cada día loitan sen desmaio en primeira liña contra o COVID-19.
As habitacións que os xogadores das categorías inferiores celestes deixaron baleiras tras o decreto do estado de alarma están, cos servizos de mantemento e limpeza activos, zona de esparexemento, cociña e lavandería, ao dispor do persoal sanitario que necesite aloxamento ou un lugar de descanso.
Nas próximas horas, seis profesionais sanitarios, que desempeñan o seu encomiable labor no Hospital Povisa, aloxaranse na residencia e outros seis, de distintos centros sanitarios da cidade, farano a próxima semana, sempre en coordinación co Sergas tras o acordo de colaboración asinado.
Para o RC Celta e a súa Fundación supón un inmenso orgullo poder colaborar con estes profesionais que cada día realizan un traballo inconmensurable e dan o máximo para coidar das persoas afectadas polo virus. É, ademais, unha maneira inmellorable de participar no aplauso que cada tarde dedícanlle os cidadáns polo seu esforzo e dedicación. Club e Fundación queren unha vez máis expresarlles o seu agradecemento polo impagable labor que están a realizar desde o inicio da pandemia.
