Os 52 concellos da provincia de menos de 20.000 habitantes xa teñen a súa disposición case 2 millóns de euros da Deputación de Pontevedra, correspondentes ás primeiras medidas activadas polo goberno provincial para facer fronte ao COVID19. Trátase da Liña de Axudas Extraordinarias, cun importe de 1,3 millóns de euros, e do adianto do 100% das axudas de emerxencia dotadas con outros 500.0000 euros. En concreto, os 52 concellos pediron o adianto das de emerxencia e solicitaron a liña de axudas extraordinarias, aínda que tres deles están a cumprimentar a documentación e poderán ter a notificación esta próxima semana.
A institución provincial xa liberou estas dúas partidas polo que os concellos dispoñen do diñeiro para facer fronte ás novas necesidades da veciñanza ao fío da crise. A estas dúas liñas súmase o adianto, tamén do 100%, do financiamento do Plan Concertado de Servizos Comunitarios Básicos e o SAF, por 2,4 millóns de euros, que agora mesmo se está a tramitar para os concellos que o solicitaron, de momento 49 dos 52.
A presidenta da Deputación, Carmela Silva, mostrou a súa satisfacción ante a acollida das medidas. “Temos que ter moito orgullo da resposta dos concellos desta provincia que, amais de estar na primeira liña de loita contra o COVID, seguen a traballar a pesar das dificultades para conseguir todas as axudas posibles para a súa veciñanza”.
Con esta inxección económica da Deputación, os concellos beneficiarios que a pediron están a poder financiar necesidades básicas da cidadanía e, sobre todo, da poboación máis vulnerable. Este diñeiro destínase á adquisición de alimentos, material de protección e desinfección como luvas e máscaras, así como gastos de asistencia en combustible o aluguer de vehículos para levar a compra de alimentos e medicinas aos domicilios das persoas maiores e en risco, especialmente ás que viven soas.
O obxectivo de estas medidas do goberno provincial, xunto aos anticipos do Fondo de Liquidez do ORAL, dotado con 21 millóns de euros, e á modificación da Liña 2 do Plan Concellos, por outros 3 millóns de euros, foi inxectar liquidez de xeito eficaz e case inmediato aos municipios máis pequenos, para financiar as consecuencias da crise do coronavirus. O investimento provincial total é de máis de 28 millóns de euros
Plataforma telemática para os órganos colexiados dos concellos
O 71% dos concellos da provincia adheridos á administración electrónica implantada pola Deputación de Pontevedra xa solicitaron a súa integración na plataforma telemática que a institución provincial puxo a súa disposición de xeito totalmente gratuíto, para a celebración de Plenos e Xuntas de Goberno. Ata o momento xa son 38 concellos os que formalizaron a súa petición para dispor da ferramenta con total seguridade e garantía.
Así, a aplicación estará habilitada na plataforma de administración electrónica e permitirá sesións telemáticas dos órganos colexiados, así como reunións, mesas de contratación a distancia, así como traballo colaborativo entre persoal funcionario. Amais, o novo sistema, ao que se pode acceder a través de ordenadores e dispositivos móbiles, permite retransmisións en directo a través da propia sede electrónica ou plataformas nas redes sociais, garantindo unha maior transparencia.
Os concellos que ata o momento solicitaron a ferramenta son: Caldas, Covelo, Mondariz, As Neves, Redondela, Tomiño, Vilaboa, A Estrada, Cambados, Cuntis, Meis, Mondariz Balneario, O Grove, Pazos de Borbén, Vila de Cruces, Baiona, Gondomar, O Rosal, Lalín, Mos, Ponte Caldelas, Salceda de Caselas, Bueu, Moaña, Moraña, Cangas, Silleda, Pontecesures, Tui, Ponteareas, Forcarei, A Guarda, Portas, Catoira, A Illa de Arousa, Poio, Arbo e Cerdedo-Cotobade.
