O alcalde de Gondomar, Paco Ferreira, lamenta que o Grupo Popular do municipio, non aproveitase a reunión con responsables da Xunta para pedirlles que deixen de “perseguir urbanisticamente a Gondomar” e céntrense en axudar e desbloquear o urbanismo do municipio. “Lonxe de facelo, a señora Paula Bouzós, só aproveitou a visita para recibir consignas preelectorais e defender interéselos partidistas e non dos gondomareños, algo ao que xa nos teñen afeitos”, manifestou o rexedor.
Ademais engade que o vogal do PP da Entidade Menor de Morgadáns deixou pasar a oportunidade de interferir ante a conselleira para evitar a derriba do local social de Prado, que a Xunta (APLU) pretende botar abaixo e ao que impuxo varias multas coercitivas de 1.000 € á propiedade.
Paco Ferreira apunta que os problemas que fixeron coñecido a Gondomar, urbanisticamente falando, “son froito do pasado e non da acción do actual goberno, que desde a súa chegada á fronte do consistorio só atopouse con inconvenientes lexislativos, contractuais e de falta de efectivos”, cuestións que non impediron redactar a ampliación de núcleos, para poder así evitar a derriba de vivendas que quedaron atrapadas coa anulación do PXOM no 2005.
Puntualiza o rexedor que a modificación da Lei de Urbanismo da Xunta de Galicia no 2016, freou todos os avances realizados ata a data no PXOM obrigando a nova lexislación a empezar de cero á Concellería de Urbanismo entón en mans de Antonio Araújo. Paralelamente á elaboración do plan este goberno empezou a redactar a ampliación de núcleos rurais para outorgar novas licenzas urbanísticas, pero sobre todo para evitar a derriba de varias vivendas. Un exemplo, foi o núcleo de Campo Grande en Vilas, Morgadáns.
Tramitación núcleos rurais
Actualmente o Concello conta coa aprobación definitiva da limitación dos núcleos rurais de Campo Grande e Prado (Morgadáns) e Peralba ( Mañufe); en proceso de tramitación pendente para a súa aprobación definitiva están os núcleos de San Roque e Carballa (Morgadáns), Mourisca (Vilaza); á espera de aprobación provisional os núcleos de Cruceiro e Telleiro (Borreiros) e Rochela (Vilaza). E finalmente Mosteiro (Borreiros) pendente de que a Xunta emita informe favorable de avaliación ambiental para a aprobación provisional.
APLU
“A Axencia de Protección da Legalidade Urbanística da Xunta de Galicia, está demasiado preocupada por actuar en Gondomar e o seu afán persecutorio contra os gondomareños é xa enfermizo”, aseverou o alcalde, quen engade que “non podemos entender nin compartir que licenzas urbanísticas concedidas a teor da normativa vixente -con informes técnicos favorables da propia Secretaría Xeral de Urbanismo da Xunta- para a APLU sexan consideradas licenzas ilegais no noso municipio”.
Paco Ferreira lamenta que “lonxe de buscar solución ao problema, recorran non só en vía administrativa, senón xudicial contra os propietarios das vivendas. E xa son oito as demandas xudiciais presentadas pola APLU contra as licenzas concedidas polo Concello de Gondomar e pendentes de xuízo”. O alcalde acusa á APLU de “ter desde hai anos no punto de mira a Gondomar, abrindo expedientes, virando visitas e mesmo centrando os esforzos co seu equipo de avogados e técnicos para machucar á nosa localidade”.
“Non valoran o esforzo que desde o Concello estamos a facer na delimitación dos núcleos ou por sacar adiante canto antes un PXOM. Eles veñen e sancionan, ordenan derribas sen importarlles as persoas que, en moitos casos non teñen nin onde vivir por ser a única vivenda que posúen unha pequena caseta de madeira… dálles igual”, indica Paco Ferreira e engade que “agora van máis aló, e lonxe de meterse cos máis débiles e desfavorecidos como afán, van a por os propietarios que teñen licenza municipal de obra e contra a autonomía local do Concello que as concedeu de acordo á lei e aos informes favorables dos técnicos municipais”.
“Á APLU preocúpalle máis que este goberno desbloquease o urbanismo en Gondomar, que empezase a conceder de novo licenzas urbanísticas, ou salvado da derriba de vivendas ás que a Axencia quería aplicarlles a picaraña, que axudar aos cidadáns”, circunstancia ante a que “este goberno advirte e quere deixar patente que loitará sen acougo para garantir a Gondomar un PXOM canto antes, e que defenderá e estará, sen dubidalo xunto aos seus veciños, disposto a loitar ata o final, convencido de que a xustiza dará a razón aos técnicos municipais e á Secretaria Xeral de Urbanismo”, concluíu o alcalde Paco Ferreira.
