Gondomar recoñecerá a traxectoria dos seus deportistas nunha nova Gala do Deporte

O Concello de Gondomar publicou as bases reguladoras dos premios da V Gala do Deporte coa que, por quinto ano consecutivo, búscase recoñecer “a entrega e dedicación de persoas, clubs ou institucións de Gondomar no mundo do deporte, que coa súa actividade, ademais de transmitir valores inherentes e necesarios para todos, en moitísimos casos están a levar o nome de Gondomar ao máis alto e todos os recunchos do mundo”.

Así o manifesta o rexedor de Gondomar, Paco Ferreira, promotor xunto á concelleira de Deportes, Nuria Lameiro, desta gala que naceu auspiciada polo seu goberno na anterior lexislatura e que “xa se converteu nunha cita ineludible para nós como para todos os veciños e veciñas do noso municipio”.

O prazo para presentar as diferentes candidaturas finaliza o próximo 29 de febreiro e poderán concorrer a calquera das nove categorías recollidas nas bases: premio ao mellor deportista masculino; premio á mellor deportista feminina; premio ao mellor deportista revelación masculino e á mellor deportista revelación feminina; premio ao mellor club ou entidade deportiva; premio ao patrocinio e colaboración co deporte; premio á traxectoria deportiva; premio ao mellor evento do ano; e, premio aos valores humanos.

Calquera club, cidadán, institución ou asociación poderá propoñer un máximo de tres candidatos/as para que sexa recoñecida o seu labor nalgunha das citadas categorías, sempre que cumpran coas condicións establecidas nas bases e “reúnan os méritos ou requisitos suficientes para concorrer ao premio”, aos que tamén o xurado ten a posibilidade de presentar candidaturas.

O alcalde, Paco Ferreira, presidirá e designará o xurado encargado de seleccionar os gañadores/as nas distintas categorías, que se determinarán o 5 de marzo de 2020. A entrega dos galardóns terá lugar o 4 de abril, no Pavillón Municipal Bernabé Costas de Miranda.

Anuncios