Un centenar de alumnos e monitores de La Conservera del Surf, Patos Surf, Point Break Patos, Txoko Surf Club Schola e Prado Surf deron este martes a benvida ás festas do Nadal disfrazados de Papá Noel. Este orixinal mergullo, que leva celebrándose desde hai máis de 10 anos, xa se converteu en toda unha tradición no municipio de Nigrán e nesta ocasión volveu a unir ás cinco escolas que operan na Praia de Patos.
Os participantes celebraron xuntos o Nadal ao grande e de paso collendo unhas ondas disfrazados de Papá Noel, surfeando co característico gorro vermello. A iniciativa, á que cada vez se apuntan máis amantes das ondas e que ademais é unha xornada de achegamento gratuíto a este deporte, traslada a Galicia un rito de benvida ás festas moi típico dos surfistas australianos, coa diferenza de que aquí desafían ao frío mentres que alá nesta época é verán e fai calor.
Pero non só é unha festa de surf e diversión, senón que se trata dun evento solidario, pois os asistentes deben pagar un tributo, achegar 1 quilo de alimentos non perecedoiros (pasta, arroz, legumes, cacao, leite, etc.) para o Departamento de Servizos Sociais do Concello de Nigrán, que será o encargado de repartilos logo entre as familias con menos recursos do municipio.
Non faltou a música e actividades programadas para os asistentes, finalizando a xornada ao saír da auga cun rico e quentiño chocolate recentemente feito. Este ano ademais pediuse aos asistentes que levasen a súa propia cunca de casa para o chocolate, unha maneira de concienciar sobre a urxente necesidade de reducir os plásticos dun só uso na nosa vida diaria.
