Ante as inundacións provocadas polas fortes choivas deste domingo no CPI Cova Terreña de Baiona, onde se está a executar o cambio da cuberta, esta mañá realizouse unha reunión de urxencia no centro. Nela participaron a dirección do CPI, representantes da Consellería de Educación, da Anpa e do Concello baionés.
Acordouse derivar o alumnado das seis aulas afectadas, dos cursos 1°, 2° e 3° de Primaria, ao CEIP de Fontes-Baíña ata o remate das obras, co obxectivo de evitar a perda de clases e de causarlles ás familias os menos trastornos posibles. A Consellería de Educación, Universidade e Formación Profesional asumirá o transporte do alumnado desde o CPI Cova Terreña ata o CEIP de Fontes-Baíña desde este martes e ata novo aviso.
Segundo a empresa que está a realizar as obras, fallou a suxeición da cuberta provisional, o que motivou a filtración de auga nas aulas afectadas. A Xefatura Territorial de Educación amosou o seu agradecemento a nais e pais do alumnado que se viu afectado por esta situación, allea ao centro e ás familias.
