Baiona fixa como festivos locais para o 2020 o 28 de febreiro e o 25 de setembro

O pleno de Baiona aprobou este xoves por unanimidade os dous festivos locais do próximo ano 2020. Os baioneses marcarán en vermello no seu calendario o 28 de febreiro, venres no que comezará a Arribada, xa que o 1 de marzo, data na que arribou a Carabela Pinta a Baiona, coincide en domingo. Desta maneira, un ano máis, os veciños e veciñas poderán gozar da festa desde o primeiro día.

Tamén será festivo o 25 de setembro, festividade de San Cosme e San Damián. Habitualmente declárase día non laborable o día 26, pero como o próximo ano 2020 coincide en sábado, desde o goberno local decidiron trasladalo ao venres. Os baioneses en xeral senten unha gran devoción e respecto cara aos santos. A devoción que vén profesando aos Santos Cosme e Damián non só cínguese ao ámbito de Baiona, senón que é extensible a todo o mundo cristián desde hai séculos. Os baioneses manteñen viva e latente a devoción aos Santos desde que no ano 1847 solicitaron ao Cabildo de Tui unha reliquia de San Cosme e esta foille concedida. A noticia foi recibida con satisfacción e foi entón cando a igrexa e o Concello puxéronse de acordo para traela ata Baiona coas maiores honras.

Segundo conta a historia, o 19 de setembro de 1847, trasládase a Tui o alcalde José Manuel Cadaval e o Abad da colexiata D. Luis García Casarrubios para facerse cargo da reliquia, que lle sería entregada polos cóengos D. José García e D. Telmo Maceira. Esa mesma tarde na Ponte de Sabarís, os portadores da reliquia eran esperados polos Rexedores, Manuel Tomás, Fernando Prieto, Juan Besada, Francisco Jorge, Santiago Fernández e Francisco Besada, así como por numerosos veciños que lles recibiron con gran xúbilo. Unha gran tirada de lumes anunciaba a súa chegada a quen agardaba no Barrio do Burgo para acompañar a reliquia ata a Igrexa de Santa Liberata onde permanece na actualidade.

Pasaron moitos anos desde entón e a romaría de San Cosme e San Damián segue en vigor. A súa festa litúrxica ata hai uns anos celebrábase o 27 de setembro pero a Santa Sé, tras o Concilio Vaticano II, adiantouna un día, é dicir ao 26. Aínda son moitos os romeiros que seguen acudindo o día 27 para facer efectivas as súas ofrendas e rezar ante os santos. Desta antiquísima romaría séguense respectando moitas tradicións, tales como as de abastecerse de mel e noces para todo o ano.

Anuncios